Sangko sa langit ang kasubo nga gibati ni Lito. Gikan sa tindahan nga gisudlan ni Lito, nakita niya nga nanggawas na ang mga kawani sa department store.
Takulahaw lang nga may miabot nga kotse. Wala siya mosipyat, mao gayud kini ang kotse nga gisakyan ni Grace kagabii. Nakasiguro si Lito nga kini maoy giingon sa dalaga nga adunay mokuha kaniya.
Nakahilak si Lito nga naglantaw, ilabi na diha nga migawas na si Grace ug mideritso kini nga misakay sa kotse. Gitungab ni Lito ang nahabiling beer sulod sa botelya ug huyhoy ang abaga nga migawas.
Giduol ni Lito ang kaubang tindera ni Grace. Iyang gipakigsultihan. “Miss, nagpaabot ka pa ba og sakyanan?” pasiuna ni Lito.
“Mao lagi, nihit ang sakyanan paingon sa Lahug, gabii na man gud,” matud sa babaye. “Aw kun mao, magkasakay diay ta miss, ayaw kahadlok nako, amiga kami si Grace nga imong kauban,” matud ni Lito.
Igo lang miyango ang babaye nga mitutok kang Lito. “Tua na man si Grace. Gikuha sa iyang bag-ong boyfriend nga kuwartahan. Suwerte kaayo kay nakakita’g kuwartahan,” matud sa babaye.
Nag-ila-ila sila si Lito ug ang babaye nga nagpaila nga si Lyn. “Gibiyaan ra g’yud ni Grace ang iyang boyfriend kay matud niya wala kuno’y nahut,” matud ni Lyn nga nagpahiyom. (Sumpayan)