Pag-abot ni Anito tungod sa Capitol Parish, nikusog ang ulan. Nipasilong siya sa dakong beach umbrella sa aseras gawas sa simbahan ug duol sa gasolinahan. Napugos siya’g palit og Banat News sa newsstand sa babaye nga tag-iya sa beach umbrella.
“Pasilong ‘sa ko kadiyot, Day, ha? Samtang maghulat og taksing bakante,” ni Anito. Niyango lang ang tambokong babaye nga naglingkod og bangkito.
Mag-hike kada buntag si Anito, usa ka CPA nga duna nay dayabitis. Usa ka oras ug tunga ang gidugayon sa iyang pag-hike. Alas singko igikan niya sa ilang balay sa Guadalupe nga nahimutang sa Bataan Street. 45 minutos muabot siya sa Ayala. Ganiha, diha lang siya nag-ilis og basang t-shirt sa waiting shed atbang sa main door sa department store. Kay nagtaligsik. Nagsige na’g taligsik samtang naglakaw siya balik sa iyang agi.
Nihinay ang ulan. Taligsik na lang. Nagpasalamat si Anito sa babayeng tindera sa newsstand. Nilabang siya sa Escario aron maghulat og taksi. Nipasilong sa punoan sa Narra. Unya nibutho sa iyang hunahuna nga nalimtan niya ang iyang shades didto sa newsstand pagpalit niya’g mantalaan. Nideretso lang siya’g balik sa agi. Way tan-aw tan-aw. Natapsingan siya’g duha ka taksi. Naigking siya.
Unya nahikap niya iyang walang bulsa sa short pants. Naa ra diay sa bulsa iyang shades! Wa niya gisul-ob kay kimot ang panahon tungod sa dag-om nga mga panganod. Nilabang siya’g balik ngadto sa habig sa Escario atbang sa simbahan.
“Ayaw’g kompiyansa’g labanglabang, Sir! Daghan na ra bang naligsan dinhi!” singgit sa babayeng tambokon nga tindera sa newsstand. Giwarawarahan ni Anito ang babaye. “Maayo pa ang babaye nga wa kaila niya, naluoy pa o nabalaka pa niya, nga usa ka tiguwang limtanon,” ni Anito sa iyang hunahuna. Gipahiyuman niya ang babaye.
Wa gyu’y taksing niurong niya. Puro may pasahero ang nangagi. Unya nituang ang taligsik. Nipadayon na lang siya paglakaw pauli. Wa man kaayo siya nabasa. May kawo man siya. Ug gikupo niya iyang hinubo nga t-shirt. (Kataposan)