Nakabantay si Roland nga nalingaw ‘sab kaayo si Kenneth sa ilang panagkuyog. “Tunga’ng gabii na man diay Roland. Daghan lang gihapong tawo no?” matud ni Kenneth.
“Mao g’yud, nag-abut-abot na gani ang mga tawo dinhi sa imnanan nga atong gisudlan. Let’s morning the night Kenn,” sagol-komedya ni Roland ngadto sa dalaga.
Mitungab sila sa bugnaw kaayo’ng light beer. Naglami ang ilang panagsultihanay. Bisan unsa na lang ang ilang gipanagsultihan. Gihisgotan nila ang mga nindot nga dancing contingents.
“Gituyo g’yud tingali sa Ginoo nga ang akong amigo wala makatunga sa among sabot, ug ingon man ang imong kasabot Kenn, aron nga kita’ng duha ang magkakuyog karong adlawa,” matud ni Roland. Giteksan ni Kenneth ang kauban niya nga boarder aron dili mabalaka kun hain na siya. Gilansisan lang ni Kenneth nga gikakita niya ang iyang kaklase sa college ug nakigpanuroy.
Nahurot g’yud ni Kenneth ang usa ka botelya’ng light beer. Gikuha ni Roland ang laing botelya sa beer gikan sa bucket ug gibutang atubangan ni Kenneth. “Hala uy, mahubog na g’yud ko ani ron Roland,” sa dalaga pa.
Bisan og dili na kini una nga higayon nga nakainom og beer si Kenneth, apan ingon sa nanginit ang iyang dunggan. Sa tanto nila’ng pagsultihanay, gitug-anan ni Kenneth si Roland nga wala siya’y trabaho.
“Makatabang ko nimo nga makatrabaho ka. Daghan ko’g mga suod nga dagko’ng negosyante,” ni Roland.
“Sige bi, tabangi ko para makatrabaho na ko Lan,” matud ni Kenneth nga ingon sa miparayeg na kang Roland. “Sure, tabangan tika Kenn,” pasalig ni Roland, dungan sa pag-agbay sa dalaga. (Sumpayan)