^

Di mosiyok

Sugilanon - Alcea Maningo (Banat) - November 4, 2014 - 12:00am

Didto si Carlos kaparking sa parkingan sa amihanang habig sa Park Mall. Puno ang duol gyud sa mall. May daghang taksi nga namarking sa iyang naparkingan. Mas ganahan man siya’g sa layo makaparking.

Kay hilig man siya’g hike. Iyang kapikas nga si Nida, nangompra og grocery. Tawgon lang siya sa selpon kun mahuman nag pangompra ang iyang kapikas.

Kapin kun kulang kap-atan ka gutlo gikan sa iyang pagparking ning sayong kahaponon, nibagting iyang selpon. Gibutang niya iyang librong gibasa sulod sa sakyanan.

“Hello” gipunit niya ang selpon sa dashboard.

“Human na ko’g pangompra,” ni Nida sa pikas linya.

Gipaandar ni Carlos ang Isuzu Crosswind nga puti. Gimaneho paggawas sa parkingan. Unya, pagliko niya sa wala, may nadungog siya nga kusog kaayo nga siyok.

“Sssssshhhh!” Kasagaran, gikan sa ligid nga nihungaw kay nabuslot.

“Tsk! Tsk! Tsk! Nahiyosan na man sab ko’g ligid!” tuaw niya dayong pahunong.

Nadismaya siya’g kadiyot. Apan hunahuna niya, lain na sab ning paugnat sa kusog. 60 na siya. Apan kaya gihapon niya ang pag-ilis og ligid sa sakyanan. Katulo na kahigayon nga naplatan siya. Kaniadtong bulan sa Abril, Hunyo ug Agosto. Naugon una niya ug sutaon kun hain sa upat ka ligid ang nihiyos. Pahuwaton na lang niya kadiyot si Nida.

Pagnaug niya, gilili niya ang duha ka ligid sa abante. Husto sa hangin. Dayon ang duha ka ligid sa atras. Husto gihapon sa hangin. Unya, may taksi nag-urong sa likod sa Crosswind. Mao diay ang nahiyosan og ligid. Nangatawa ang mga drayber og taksi nga nag-estambay sa duol.

“Ang taksi ang nahiyosan, Sir,” sa pinakaduol nga tawo. Nagkatawa gihapon.

“Abi gyud nako’g akong ligid. Kadaghan na man gud ko hiyosi,” ni Carlos. Nibalik og sakay sa Crosswind.

“Di man na mosiyok imong ligid kun matunok. Tubeless man na,” sa tawo.

Nakaamgo si Carlos nga siya diay ang gikataw-an sa mga drayber. Apan wa siya’y mahimo. Di man siya suheto sa ligid. Di man siya mekaniko. Igo ra man siyang kamao modrayeb.

Apan sa laing bahin, nalipay na lang siya nga nakapakatawa og tawo. Dili sayon ang pagpakatawa og tawo. Nakahatag siya’g libreng tambal sa panglawas sa tawo. Kay matud pa, “Laughter is the best medicine.” (Kataposan)

APAN HUSTO ISUZU CROSSWIND LIGID MAN NIDA NIYA SIYA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with