“Nag-unsa ka man dinhi migo, magpa-hygiene ka ‘sab?” matud sa usa ka seksi apan ingon sa komedyante nga babaye nga nangutana kang Caloy. Wala masayod si Caloy kon unsaon niya sa pagtubag ang babaye.
Nakita ni Caloy nga mipahiyom ang pipila sa mga babaye nga tingali gusto nga mamati kon unsay iyang tubag. “No, dili ko magpa-hygiene uy. Gibisitahan lang nako si Dr. Benjie kay classmate man gud mi sa pagtungha namo sa pagka doktor,” gibakakan ni Caloy ang babaye nga nangutana kaniya.
“Aw doktor ka ‘sab diay?” matud sa laing babaye nga diha maglingkod sa wala nga bahin ni Caloy. Nakahuna-huna si Caloy og paagi aron usab siya malingaw samtang makigsulti siya sa mga babaye nga entertainers sa lainlaing bar ug night clubs sa dakbayan.
“Gianhi nako si Dr. Benjie kay nakahuna-huna man gud siya nga mo-leave unya kay wala man kuno’y makapuli niya, ako maoy temporaryo nga modumala dinhi sa klinik,” ni Caloy pa.
Miyango-yango ang ubang babaye nga nakadungog sa gisulti ni Caloy. “Mangutana ko dok, unsay bation ninyo nga mga doktor nga lalaki kon makakita sa pribado’ng parte sa lawas sa mga babaye nga inyong hilngon?” nangutana na usab ang komedyante nga babaye.
Naghuna-huna na usab si Caloy og maayo nga tubag nga aron dili siya masakpan nga dili diay tinuod nga doktor. “Baliwala na kana kanamo kon unsay among makita kay mao man kana ang among trabaho kada adlaw. Ordinaryo na lang kaayo kana namo nga mga doktor,” matud ni Caloy. Nakabantay si Caloy nga diha’y usa sa mao nga mga babaye nga entertainers nga wala moapil sa ilang panagsultihanay ug igo lang naminaw. “Ikaw miss, asa nga night club ka nagtrabaho?” gipangutana ni Caloy ang maanyag nga babaye.
“Bag-o pa ko nga nagtrabaho sa Wild Orchids. Semana pa ko kapin pero gipangitaan man ko ni sir Wendell og health certificate,” pasabot sa babaye. (Sumpayan)