Mga bayente na ka tuig nga mibiya si Ingko Sito sa among lungsod sa Calpato. Ug halos bayente na usab ka katuigan ang pangandoy ni Nanay Usay ug Tatay Emon nga mopauli na siya. Gihimo nila ang tanang panawagan sa TV, radyo apan hangtod karon natigulang na lang sila wa gyu’y Sito nga mipatim-aw.
Nananghid si Ingko Sito nga muadto siya sa Mindanao kay gusto siyang moasenso. Diri gud sa among probinsiya pait kaayo ang panarbaho, sa pantalan ka punta.
Bunalan ka sa mga sinakong mais ug kopras. Dili pud siya gustong managat. Mao nga nakahukom siya nga muadto sa yuta sa mga saad basin og moasenso siya didto.
Karong tuiga magsaulog sila si Tatay Emon ug Nanay Usay sa ilang ika- singkwentang sumad sa ilang kasal. Nagsabot ang Emon-Usay nga himoong bungga ang kasumaran. Pasalamat nga pulos pa sila buhi.Tiaw ba nga si Nanay 73 na ug si Tatay 75 na. Basin sunod tuig dili na sila makaabot pa. Si Tatay Emon kanunay na lang sugmatan sa iyang hubak. Ug si Nanay Usay kanunay nag-antos sa iyang artritis. Karon naghandom na usab silang mopauli si Ingko Sito.
Mga usa ka buwan sa wala pa ang kasumaran nagsugod na usab ang panawagan sa TV ug Radyo nga papaulion si Anecito Amotan aron makatambong sa ika-singkwenta ka kasumaran sa kasal sa iyang Nanay Usay ug Tatay Emon. Unya miabot ang kasumaran. Puliki ang pamilyang Emon-Usay sa paghikay og pagkaon. May nag-asal, naglata og karne may nagluto og pansit, ug kan-on. May namalit usab og ilimnon aron bibo ang kasaulogan.
Unya may hamtong nga miabot. Ang mga batan-on wa kaila niya. Apan ang iyang mga igsoon sigurado nga mao siya.
“Mabuhi si Anecito Amotan, Mabuhi.”
Si Nanay Usay nga nakadungog sa singgit migawas sa balay, dayong gakus ni Ingko Sito.
“Sito, Sito, maayong mipauli ka Dong, ikaw ang labing bililhon nga gasa sa ika-singkwentang tuig sa among kasal ni Tatay Emon nimo.”
Ako usab nga nagsud-ong gibati og kalipay kay mipauli na gayud ang akong uyoan nga karon pa nako nakita. (Kataposan)