Dear Tita Salie,
Hello! Good morning. Pasayloa ko nga dili nako puwede ibutyag ang tinuod kong pangalan ug ang akong address tungod kay maulaw man ko niining akong situwasyon karon.
Kanunay na lang ko nga maghilak tungod niining akong situwasyon nga wala ko masayod kun unsaon nako kini aron ko makalingkawas niini. Wala sab ko masayod kun kinsay akong duolon aron makatabang kanako.
Nagproblema gyud ko, Tita Salie, tungod kay nabulit ko sa utang karon. Ug wala na ko masayod kun unsaon nako kini aron masulbad o mahubad ang gapos nako nga mao ang akong mga utang. Usahay mangutang ko sa laing tawo aron ibayad sa akong utang. Ug hangtud karon wala na gyu’y kataposan ang akong pagpangutang. Unsa may akong buhaton? Palihog pasabta ko sa maayo kong buhaton. Daghang salamat sa pagtagad ning akong suliran.
* * *
Good day. Usahay atong mahunahuna nga ang pagpangutang maoy sulbad sa atong problema.
Malipay kita kay dunay nagpahulam ug nagpautang kay nasulbad ang atong bayranan. Dili gyod nato kalimtan ug kanunay natong hinumdoman nga ato lamang gibalhin ang atong utang ug bayranan sa lain ug ato kining gipadugangan ang atong utang tungod kay ato namang apilon og bayad ang tubo. -- Tita Salie