Mipahimutang si Rey sa iyang kaugalingon. Wala madugay, may seksing silbidora nga miduol kaniya. Mi-order siya’g tulo ka botelyang serbesa ug sumsoman.
Mibiya gilayon ang silbidora sa iyang atubangan aron pagkuha sa iyang gi-order. Wala madugay, nahibalik kini nga nagsapwang na sa tray nga gipatungan sa tulo ka botelyang serbesa ug sumsoman.
Human ikapahimutang ang iyang gi-order, si Rey misugod gilayon pag-inom. Buot niyang lumsan sa ilimnon ang kasakit nga iyang gibati.
Miinom si Rey ug miinom. Paspas ang iyang pag-inom ug kadali ra niyang nahurot ang tulo ka botelya. Gitawag na usab niya ang silbidora ug mi-order pa og laing tulo ka botelya. Sa dihang gihatod na kini sa iyang lamesa, gipaspasan niya kini pag-inom.
Unya, takulahaw lang, napahunong si Rey sa pag-inom. Nakabig ang iyang pagtagad sa milanog nga kanta nga giawit sa usa ka kostumer pinaagi sa videoke. Gipaubos niya ang iyang mga kamot nga naghakgom sa botelya sa serbesa ug naminaw nga maduloton sa kanta. Ingon sa may bahin sa iyang kahiladman nga natukbil sa mga linya sa kanta sa Men Oppose nga nag-ulohan og “Kasalanan Ba.†Gibati siya nga ingon sa naigo siya sa mensahe sa maong awit. -- Sumpayan pa