Gula 139
Dihadiha mikalit si Rey paggawas sa iyang gitagoan. Midagan siya nga gituyo gayod nga makahimo’g kasikas ang iyang mga tunob aron pagdani sa pagtagad sa kaaway nga naghupo sa luyo sa kahon. Maoy iyang pangagpas nga naniid kini kaniya.
Wala masayop si Rey. Sa dihang nakabati ang kaaway sa kasaba nga nahimo sa iyang mga tunob, kalit kining migawas gikan sa luyo sa dakong kahon ug girakrakan siya sa gikuptan niining armalite. Apan wala maigo si Rey. Midiretso siya pagdayib paingon ngadto sa luyo sa kahon.
Niining tungora, nagkabaylo na sila si Rey ug ang kaaway og nahimutangan. Siya na karon ang nahimutang sa gitagoan sa kaaway kaganina ug ang kaaway nga migawas sa dapit nga gitagoan niini kaganina mao usay gipasalipdan ni Rey. Pabor na unta kaayo kaniya ang pagluthang sa kaaway kun wala pa siya mopahawa sa haligi nga gipasalipdan. Apan mao ra gihapong estoryaha kay dili man usab mogawas ang kaaway sa gihup-an niini kun wala usab siya mogawas sa gipasalipdang haligi.
Pagkilab sa usa ka daklit human si Rey motugpa sa salog sa luyo sa kahon midiretso siya paghayang. Unya, daw may ligid ang iyang likod nga midailos sa salog pagawas sa luyo sa kahon. Wala makabantay ang kaaway sa iyang pagdailos ug sayon ra kaayo niya kining gipusil. Milit-ad kini dayong katumba nga nabuhian ang armalite nga gigunitan. -- Sumpayan pa