Ang pagdagsang sa daghang mga tawo sa dakbayan sa Sugbo niining panahon sa kasaulogan sa tinuig nga pangilin ni Senyor Santo Niño mao usab kini ang panahon sa pagdagsang sa mga dautang elemento nga naglakip sa mangunguot, manglabnihay ug mangingilad nga ang biktimahon kadtong mga bisita nga gikan pa sa laing lalawigan ug apil na ang malipat nga taga dakbayan.
Ang mga deboto nga mosimba ni Senyor Santo Niño sa Basilica Minore del Santo Niño mao karon ang masugamak sa pagduotduot sa daghang mga tawo nga mao usab ang higayon sa pagsagol sa mga dautang elemento nga manayming lang og higayon nga makabiktima og mga tawo nga malipat sa pag-amping sa ilang gidala nga shoulder bag, alahas, cellphone ug salapi.
Sa mga dapit nga molabay ang mga PUJ nga mag-ilogay ang pasahero sa ilang pagsakay ang mangunguot dili lamang mailhan nga mosagol usab sa pagsakay ug ang tuyo mao ang magdanghag nga pasahero nga maoy ilang biktimahon.
Makiglumba ang mangunguot nga mga lalaki ug babaye sa pagsakay sa PUJ apan ang tuyo dili ang pagsakay kun dili ang paghatag lamang og kasamok sa nag-ilogay nga pasahero apan ang mga kamot tua nagmaneho sa pagkuot sa shoulder bag sa pagkuha sa cellphone, pitaka ug uban pa.
Kun magsul-ob ka og mahalon nga alahas sama sa kuwentas, ariyos ug uban pa dali kaayong makuha sa maong grupo sa mga lalaki ug babaye nga mailhan sila tungod sa kaluhag sa ilang mga lihok ug saba kaayo sa panahon sa ilang pagpakig-ilog og sakay sa tinuod gayod nga pasahero.
Bisan ang mga lalaki nga ang cellphone ilang gitakin sa hawak lakip pa gihapon kini sa ilang makuha kay dili man makamatikod ang biktima sa paggakos nga pagahimoon nga ang tuyo mao lamang ang pagtangtang sa cellphone nga gitakin sa lalaki nga pasahero nga mahimo nilang biktima.
Ang mga dapit sa dakbayan sa Sugbo nga mosagol sila sa pag-ilog og sakay sa PUJ sa mga pasahero nga gikan pa nga misimba sa Santo Niño mao ang mga dapit nga nahimong jeepney stop sa mga PUJ, sama sa Cathedral sa atubangan sa Saint Peter Funeral Homes, dalan Colon sa atubangan sa Colonade, dalan Legaspi, Magallanes, Manalili ug uban pa.
Hinuon gitambag sa kapolisan nga ngadto sa mga deboto niining panahon nga aron kalikayan nga mabiktima sa mangunguot ug manglabnihay maoy labing maayo nga dili lamang magsul-ob og mahalong alahas, dili magdala og dakong kantidad nga salapi.