Dear Tita Salie,
Good day. Just call me Ms. Virgo, 17 years of age, kanunay gyud ko mobasa sa imong column Tita.
Ang akong problema mahitungod kini sa akong lovelife, nga usahay makalipay kanako ug usahay mopasakit sa akong dughan.
Karon gud nia ko nagpuyo sa balay sa amiga sa akong mama, nga dunay anak nga lalaki. Akong nabantayan nga gaan kaayo ang akong loob kaniya busa dali kaayo ming nagkasuod.
Unya dunay girl nga nakagusto kaniya ug diri nako tig-text nga tungod niini magsige na mi og kuyog sa maong lalaki kay mao man kini ang permi namong estoryahan. Apan dihang wala na mo-text ang girl dili na pud mi magsige og kuyog Tita.
Karon nga dili na mi tigkuyog akong na-realize nga na-inlove na diay ko niya kay mora og kuwang na man akong life nga dili na mi magsige og estorya. Dihang ako siyang giteksan og message nga naghisgot og gugma, maglikay na man hinuon siya nako, Tita. Ug karon duna na siya’y uyab. Unsa may akong buhaton karon? Palihog pasabta ko. Thank you very much and more power!
* * *
Ms. Virgo,
Ayaw lamang laina ang imong hunahuna ug ayaw kasuko kun muingon ko nimo nga wala’y gusto kanimo ang maong lalaki. Seguro ang iyang gibati kanimo pagbati sa usa ka igsuon samtang usa lang ka balay ang inyong gipuy-an. Giisip ka niyang igsuon hinungdan nga ganahan usab siyang makigkuyog nimo samtang inyong estoryahan ang babaye nga mo-text kanimo ug naibog niya. Wala ka isipa niya nga laing tawo kun dili miyembro sa ilang pamilya ug maybe diha ra kutob ug mao lang kini ang iyang ihatag kanimo.
Abi gud nimo dunay mga lalaki nga tag-as kaayo’g sense of morality. Puno sa values ang ilang kinabuhi tungod sa pagpadako sa ilang ginikanan. Lainan lang gyud siya maghunahuna nga anaa mo sa usa ka panimalay apan duna moy pagnanasa sa usa’g-usa. Dili niya madawat ang maong situwasyon.
Busa aron dili ka masakitan hinay-hinaya pagkutlo ang imong gitagoan nga pagbati ngadto kaniya ug maoy hunahunaa kanunay nga anaa ka diha tungod ug alang sa imong pag-eskuyla. -- Tita Salie