Samtang nagsulat si Sonia sa iyang monthly report sa niaging bulan mahitungod sa iyang katungdanan isip Guidance Counsellor sa Banaba National High School, nagkantakanta siya karong hapona. Gikanta niya ang mga paborito niyang mga awit ni Karen Carpenter. Nagsugod sa We’ve Only Just Begun.
Daw malipayon siyang nagsulat sa iyang report ibabaw sa iyang lamesa sulod sa iyang buhatan dinhi sa maong eskuylahan. Sa iyang pag-inusara dinhing opisinaha, karon lang palis, humag paniudto, siya nakahunahuna og kantakanta. Wala pa siyay tuig dinhi sa iyang pagtrabaho.
Walo ka tuig na siyang minyo sa iyang bana nga si Jimmy, magtutudlo sa Cardaba National High School. Kay bakasyon man ron, si Jimmy ang nahibilin sa ilang balay sa baryo Kamangyan. Duha na ilang anak, puro babaye. Sila si Fe, 7 anyos, nagtungha na sa grade one. Ug si Lira, 2 anyos.
Alas 3 sa hapon, nibagting ang selpon ni Sonia ibabaw sa iyang lamesa. Iyang gipunit.
“Hello†niya pa.
“Hello, Langga†tingog ni Jimmy. (Langga maoy ilang tawganay sa usa’g-usa).
Unya nadungog ni Sonia ang background music sa ilang balay. Nagpatukar diay og stereo si Jimmy sulod sa ilang sala. Mga awit ni Karen Carpenter ang nagtingog. Ug diha pa nakaamgo si Sonia nga di diay siya kamemorya sa mga lyrics sa mga kanta ni Karen Carpenter. Nahibulong siya nganong nakanta niya ang sobra napulo na ka awit. Akapela lang.
“Abi nimo nganong nitawag ko nimo?†ni Jimmy.
“Wa gyud koy ideya. Apan basi’g ni-tsek ap ka lang nako, kun nagtrabaho ba ko. Wa ba maglakwatsa†ni Sonia. Nagpahiyom.
“Mangayo ko’g pasaylo nimo kay duna koy nalimtan. Ikaw seguro, nalimot sab ka. Apan ako gyung obligasyon ang paghinumdum†ni Jimmy.
“Unsa man na, Langga?†ni Sonia.
“Ganihang buntag, paglakaw nimo, haw-ang kaayo akong gipamati. Gisuroy kong mga bata sa plaza. Unya huma’g paniudto, ako silang gipakatulog. Dayon giganahan gyud ko’g patukar sa mga awit ni Karen Carpenter†ni Jimmy.
“Sulagma gyud Langga. Dako kong kahibulong. Kay memoryado nako iyang mga kanta. Samtang nagpatukar ka diha, nagkantakanta ko diri. Sama ra sa nadungog nako ang iyang mga awit sa gilay-on nga diyes kilometros†ni Sonia.
“Duna diay kay psychic o telephatic power?†ni Jimmy.
“Nahibulong bitaw ko†ni Sonia.
“Apan tungod tingale, Langga, kay wedding anniversary nato rong adlawa! Mao man nay gipangkanta sa atong mga bisita, pag-sing-along human sa reception sa atong kasal†ni Jimmy.
“Happy Anniversary diay, Langga!†ni Sonia. Nitulong luha sa kalipay.
“Same to you. Mao nay akong ipangayo’g pasaylo nimo. Kay nalimot gyud ko karong petsaha,†ni Jimmy.
“Pareho ta, Langga. Way angay ipangayo’g pasaylo. Kay ako mangayo sab og pasaylo nimo. Sabtonon na man Langga. Kay bisi man tang duha, tungod sa atong kalisod†ni Sonia.
“Unya, asa man ta rong hapon inig pauli nimo?†ni Jimmy.
“Sabutan ta lang unya nato, inig uli nako. Basta manihapon gyud ta sa gawas. Dalhon natong mga bata†ni Sonia.
“See you later, Langga†ni Jimmy.
Nadungog pa gihapon ni Sonia ang awit ni Karen Carpenter sa stereo sa ilang balay. Background music sa ilang paghinabi sa selpon.
Nakapanghupaw si Sonia paghuman niya’g pirma sa iyang report. Kahibulongan kaayo ang nabuhat niya. (Kataposan)