Alfa Wanbatz daog na sab sa ABL

CEBU, Philippines — Si Jay-R Artizuela mipabuto og 20 puntos uban ang tulo ka rebounds ug tulo ka assists aron pangulohan ang Alfa Wanbatz ngadto sa 77-65 nga paglampaso sa Persecutors sa 30-above division sa Amicis Basketball League (ABL) Season 2 didto sa Tayud barangay gym sa Consolacion.

Wala na molingi pa ang Alfa Wanbatz sukad sila miposte og sayong 23-15 nga labaw dayon na ngadto sa pagkadlit sa ikaduha nilang sagunson nga daog.

Sila si Dodong Cavan, Dennis Batav ug John Haniel Abinales nagkumboya'g 27 puntos apan wala silay nahimo gumikan kay ang Persecutors napilde sa ikaduhang higayon sud sa tulo ka duwa.

Sa laing bahin, Alvie Alviola mipabuhagay og 27 puntos, lima ka assists ug upat ka steals sa dihang gibugha sa Miners ang Casili Residences, 83-75.

Sila si Eleazar Opendo ug Benigno Tiongzon nagkumbinar og 41 puntos alang sa Miners nga nagkupot na karon og 2-1 nga baraha.

Ang Casili Residences nasugamak sa ikaduha nilang sagunson nga pilde bisan nakakuha og 22 puntos gikan ni Dexy John Suico ug 17 puntos ni Steve Golingan.

Sa laing resulta, si Joseph Gerundio mipupo og 23 puntos, tulo ka rebounds ug tulo ka assists sa dihang gilubong sa Los Amigos ang Top Gun, 77-60, alang sa una nilang daog.

Si Gerundio giabagan ni Mark Cuadra uban ang 17 puntos ug ni Joefar Gerundio nga mihipos og 10 puntos.

Sila si Kier Semilla ug Rex Bendano nakatigum og 38 puntos apan nangahoyhoy ang ilang abaga gumikan kay ang Top Gun nagpabiling bokya sud sa duha ka duwa.