Magsayo way gikahadlokan
CEBU, Philippines — Ang bag-ohay pang gikoronahan nga WBC featherweight champion nga si Mark "Magnifico" Magsayo nagkanayon nga wala siya'y gikahadlokan ug andam siyang makigharong bisan kinsa nga iparang batok kaniya sa umaabot.
Si Magsayo mikuha og atensiyon sa kalibutan sa boksing human gipukan ang inilog nga kampiyon nga si Gary Russell, Jr. pinaagi sa majority decision aron sakmiton ang WBC featherweight title niadto lamang Dominggo didto sa Borgata Hotel Casino and Spa sa Atlantic City, New Jersey.
Gawas nga giinat ang perpekto iyang record ngadto sa 24-0 uban ang 16KOs, pormal sab nga gipaila-ila sa 26-anyos nga si Magsayo ang iyang kaugalingon isip labing bag-ong bitoon sa 126-pound division.
Ang garbo sa Tagbilaran City, Bohol mipadayag nga andam siyang makig-rematch ni Russell, nga wala mahimuot sa desisyon nga nagpalagpot niini sa trono nga iyang gilomloman sud sa pito ka tuig.
Giklaro hinoon ni Magsayo nga dili ang iyang gusto maoy matuman kondili ang pagbuot ni Sean Gibbons, ang presidente sa MP Promotions nga maoy naghatag og direksiyon sa iyang karera.
“It’s up to sir Sean Gibbons and my promotions. It’s up to them,” dason pa ni Magsayo kabahin sa gusto niining away sa umaabot. “But I’m willing to fight anybody now. I’m a champion now.”
Sa pagka karon, si Magsayo maoy ikalimang Pinoy nga kampiyon sa kalibutan sa boksing sunod nilang Nonito Doinaire, Jr. (WBC bantamweight), John Riel Casimero (WBO bantamweight), Jerwin Ancajas (IBF super flyweight) ug Rene Mark Cuarto (IBF minimumweight).
- Latest
