Magic Johnson gibirahan ang Lakers

CEBU, Philippines — Gipikhan ni Hall of Fame NBA legend Magic Johnson ang Los Angeles Lakers human sa makauulaw niining 37 puntos nga kapildihan ngadto sa Denver Nuggets.

Sa ikaduhang labing dako nga pilde sa karera ni LeBron James, ang Lakers gikulata sa Nuggets, 133-96, niadtong Dominggo.

Nakakuha kini og malaha nga reaksiyon gikan ni Johnson, nga misaway sa Lakers tungod sa kakulang niini og paningkamot.

"We as Lakers fans can accept being outplayed but we deserve more than a lack of effort and no sense of urgency,"  suwat pa ni Magic Johnson sa iyang Twitter diin siya adunay 5.1 ka milyon ka mga sumusunod. "Owner Jeanie Buss, you deserve better."

Si James mi-iskor man tuod og 25 puntos apan nakapasud lamang og siyam sa 23 niya ka itsa alang sa Lakers nga nasugamak sa ikatulong sagunson nga higayon.

Si All-Star guard Russell Westbrook miuyon nga kinahanglan nilang motrabaho og maayo sa korte apan midugang nga si Johnson wala masayud sa tinuoray nga sitwasyon sa ilang koponan.

"Magic's entitled to his opinion. And he's not here every day. He's not around us every day. He's not aware of what's going on internally with us and trying to figure things out," depensa pa ni Westbreook sa Lakers.

Durant di kaduwa unom ka semana

Emmanuel B. Villaruel

CEBU, Philippines — Ang All-Star forward sa Brooklyn Nets nga si Kevin Durant nakahiagum og angol sa wala niining tuhod atol sa ilang kadaogan batok sa New Orleans Pelicans niadtong Dominggo ug gikataho nga dili kini makapakita'g aksiyon gikan sa upat ngadto sa unom ka semana.

Sa maong duwa diin gipakakaging sa Nets ang Pelicans, 120-105, si Durant nagtakiang nga migawas sa ikaduhang kuwarter human sila nagbangga sa iyang teammate nga si Bruce Brown.

Sa usa ka opisyal nga pamahayag kagahapon, gikompirma sa Nets nga nayayay si Durant apan wala sila mihatag og dugang detalye kon kanus-a kini makabalik og duwa.

"Following an MRI this morning, Kevin Durant was diagnosed with a sprained medial collateral of the left knee," matud pa sa Nets. "Durant is expected to return to full strength following a period of rehabilitation. Updates regarding his return will be provided as appropriate."

Si Durant mi-average og 29.3 puntos, 7.4 rebounds ug 5.8 assists matag duwa alang sa Nets, nga nahimutang karon sa ikaduhang dapit sa liderato sa Eastern Conference bitbit ang 27-15 win-loss record.