Giannis bayani sa Bucks
CEBU, Philippines — Si Giannis Antetokounmpo mipasud sa iyang layup sa nahibilin nga dos segundos aron aswaton ang Milwaukee Bucks ngadto sa 126-125 na kadaogan batok sa Charlotte Hornets sa NBA kagahapon didto sa Fiserv Forum sa Milwaukee, Wisconsin.
Ang gikaintapang "Greek Freak" mibugwak og 40 puntos uban ang 12 rebounds samtang si Khris Middleton midugang og 21 puntos alang sa Bucks nga miinat sa nagkadena nilang daog ngadto sa walo ka duwa.
Ang tres ug duha ka free throws ni Middleton maoy nakapa-abante sa Bucks, 125-122, sa pinal nga 8.6 segundos sa aksiyon.
Mitubag sab hinoon dayon ang Hornets pinaagi ni LaMelo Ball nga milansang og 3-pointer aron pagtabla sa iskor, 125-125, sa nahibilin nga 5.9 segundos.
Nagdanga-danga unta ang overtime apan napugngan kini ni Antetokounmpo nga mabayahinong mipasud sa krusyal niyang layup aron pagduso sa Bucks ngadto sa tam-is nga kadaogan.
Si Ball mipabuhagay og career-high 36 puntos apan nakawang ang iyang paningkamot sa habig sa Hornets. Sila si Kelly Oubre Jr. ug Miles Bridges nagkumboya og 47 puntos sa pilderong kawsa.
- Latest
