US Open 9-Ball Championship
CEBU, Philippines — Ang mga Pinoy’ng bilyarista mibulhot ngadto sa impresibong sinugdanan sa 2021 US Open 9-Ball Championship didto sa Harrah’s Resort sa Atlantic City, New Jersey.
Ang garbo sa Sugbu nga si Warren Kiamco milusad sa iyang kampanya alang sa $50,000 (P2.5 million) nga ganti pinaagi sa pagkastigo sa Amerikanong si Michael DeLawder, 9-3.
Si Kiamco, duha ka higayon nga naka-gold medal sa Southeast Asian (SEA) Games, makigharong sunod batok sa laing Amerikano nga si Justin Espinosa.
Ang mga kababayan ni Kiamco nga sila si Carlo Biado, Dennis Orcollo, Johann Chua, James Aranas, Jeffrey de Luna, Roland Garcia, Daniel Dagotgot, Jeffrey Ignacio, ug Roberto Gomez gisubhan sab og daog ning unom ka adlaw nga torneyo nga nagdalit og kinatibuk-ang $300,000 nga premyo.
Si Biado mipakaging ni Steve Fleming, 9-2, samtang sila si Orcollo, Chua, ug Aranas parehong miposte og 9-1 nga demolisyon batok nilang Miguel Angel Giron Mendieta sa Honduras, Steven Way sa US, ug Sakura Muramatsu sa Japan.
Wala sab magpaalkansi si De Luna nga mipukan ni Edward Abraham, 9-5, ug ingon man sila si Garcia, Dagotdot, Ignacio, ug Gomez.
Si De Luna milubong ni Nic Torraca, 9-2, si Dagotgot nakaipsot batok ni Jaydev Zaveri sa India, 9-7, si Ignacio mipayaka ni Tyler Adolini, 9-6, samtang si Gomez mipatigbabaw batok ni Joseph Testa, 9-7.
Dili hinoon tanan pagmaya ang nadangatan sa mga Pinoy gumikan kay si Dan Segui gilampornas man ni Donny Mills, 9-1.
- Latest
