Pintok na modiskurso

Bongga kaayo ang inagurasyon sa Cebu City Hall karong adlawa alang sa pagsugod na paglingkod ni Mayor Michael Rama alang sa lain niyang tulo ka tuig nga termino pagka mayor.

Dagko kaayong mga arko ang gipahimutang na sa Plaza Sugbo, atubangan sa Cebu City Hall, diin anha ipahigayon ang dakong kalihokan karong udto.

Ang maong mga arko nga hinimo gyud sa puthaw maoy makapadugang sa kaanindot sa talan-awon sa dapit, diin anaa ang estatuwa ni Don Vicente Rama nga apohan sa mayor.

Dungan sa paglingkod ni Mayor Rama sa katungdanan karong udto, dako kaayo niyang garbo kay sa iyang pagdaog sa pagka mayor, kapin sa 35,000 botos ang iyang labaw sa kandidato nga nagsunod kaniya.

Daghan ang nakabantay og kausaban ni Mayor Rama karong nahatagan siya og makabungog nga mandato sa katawhan.

Sa iyang mga pakigpulong, lain na ang iyang estelo, ug diretso na sa iyang gustong ipasabot.

Gani, usahay ang iyang mga sakop nakabantay nga ang mayor igo na lang mangayo’g katahuran atol sa flag-raising ceremony ug ang city administrator na maoy tahasan niya paghatag sa mga inpormasyon.

Nindot kaayo kon kini magpadayon. Apan tambag nako ni Mayor Rama nga mopili gyud siya og mga tawo nga seryoso pagsulbad sa problema kabahin sa trapiko, lunop ug baha ingon man sa basura, ug uban pa.

Mga tawo nga wa lang mag-apas sa sweldo nga ilang madawat, kondili, nagtinguha sila nga ang administrasyon ni Mayor Rama makahatag og daghang benepisyo sa katawhan.

* * *

Sa Mandaue City, padayon ko nga midayeg ni Mayor Jonas Cortes kay bisan og dili kaayo siya magpa-interview sa mga sakop sa media, apan hilom ra siya nga nagserbisyo para sa katawhan.

Dili na lang nako ibatbat pa kon unsay iyang mga gihimo kay sigurado ko nga ang taga Mandaue nasayod na niini, ug mao nga gipadaog nila si Mayor Cortes sa miaging eleksyon.

Sa Talisay City, aw dili na makwestyon ang pagka maayong moserbisyo ni Mayor Samsam Gullas. Ambot kaha kini si Mayor Didoy Suan sa Cordova kay karon pa man siya mahimong mayor.

Apan mora’g napanglantawan nako nga maayo’g panglantaw kini si Mayor Suan alang sa kalamboan sa Cordova. Ikaduha, dili hambugero nga pagkatawo, ug mao nga pinangga siya sa taga Cordova.

* * *     

Uy, kinsa man kining “Mayor Jun Diamante” nga gireport nga nalambigit sa smuggling? Dinhi sa Cebu, ang mayor sa Tuburan mao ang higala sa media nga si Aljun Diamante.

Giteksan nako si Mayor Aljun ug gipangutana kon siya ba ang gipasabot sa report nga usa ka mayor nalambigit sa smuggling, apan wa pa ko niya tubaga.