EDITORYAL - Kinsay nagpatay sa agrikultura?

Si president-elect Ferdinand Marcos Jr. mipadayag ng daan nga iyang dumalahon ug tutokan ang sektor sa agrikultura sa nasud, nagtinguha siyang matabangan ug mapalambo ang maong sektor alang sa seguridad sa pagkaon sa nasud ug sa samang higayon matayhopan pa og dugang kinabuhi ang mga maguuma sa nasud.

Apan sa dili pa kini niya buhaton, kinahanglang hawanan una niya ang Department of Agriculture ug Bureau of Customs gikan sa mga hiwing opisyales nga maoy protektor sa mga gitumbok nga smugglers og agricultural products.

Si Senate President Vicente “Tito” Sotto III ug ang senado ning bag-ohay lang mipublikar sa mga pangalan sa mga opisyales mismo sa maong duha ka mga ahensiya sa gobiyerno ug mga pangalan sa gialegar nga mga agri-products smugglers.

Kaniadto pa baniog na kaayo ang kurapsyon gikan sa smuggling diha sa BOC, mapa- luhong mga sakyanan, heavy equipment, drugas, ukay-ukay ug mga agricultural products. Apan hangtud karon, nagpabilin gihapon ang operasyon.

Ang maong mga ahensiya mao untay gitahasan sa gobiyerno pagprotihir sa gobiyerno gikan sa pagpalusot ug kaayohan para sa mga maguumang Pilipino.

Ang kurapsyon nga gipanaad ni Pres. Rodrigo Duterte nga iyahang puohon apan daw pakyas siya aning  dapit kun mapamatud-an.

Mismo ang National Intelligence Coordinating Agency (NICA) nga gilangkuban og dili lang usa kondili daghang intelligence units sa gobiyerno ang mikompirmar sa tanang nahipos nilang impormasyon bahin sa mga pangalan sa maong mga hiwing opisyal ug sa mga smugglers.

Apan kining gitahasan naman hinuoy hinungdan kun nganong nisamot og kakabus ang mga maguuma tungod sa pagpalusot nila dinhi og mga produkto nga kakompetinsiya sa mga produktong lokal.

Ang nakasakit pa gyud niini, gibaligya kini sa mas baratong presyo nga dili kayang matupngan sa mga lokal nga maguuma. Tungod niini, alkanse kanunay nga mga lokal nga maguuma ug dili nalang mopadayon og panguma, ang uban gipamaligya nalang sa mga land developers ang ilang mga umahan kay wala may kaugmaon sa panguma karon. Walay laing giampo karon sa mga maguuma, tabangan sila sa gobiyerno nga makabalik  sa panguma dungan sa pagsalig nga makaginansiya sa ilang abot.

Apan dili kini mahitabo kun dili molihok si Marcos batok aning mga smugglers ug smuggling protectors nga gipanganlan sa Senado.