Atong ipangaliya pero bantayan
Atong nuntan ang awhag ni President-elect Ferdinand Marcos Jr. nga mangaliya ug manghinaut ta sa kalamposan sa iyang pamunoan sa pagtuman sa saad pagpalambo sa nasud. Ato ning himuon bisan sa abundang sukaranan sa atong mga pagduda:
Napamatud-ang mga kaso sa pangabuso ug pangawat sa iyang mga ginikanan;
Pagka konbikto niya sa wa pagbayad og buhis sa siya pay bise gobernador ug hangtod nga na-gobernador sa Ilocos Norte; ug
Mga dokumento nga naglambigit niya, dihang sakop pa sa Senado, sa P10 bilyones nga pork barrel scandal ni Janet Lim Napoles.
* * *
Pero di maayong timaan sa kahulogan sa iyang awhag nga kahiusahan (unity) ang pagbombardiyo ug tubig ug pagbunal sa mga biktima sa diktadura sa iyang amahan samtang nagprotesta sa Liwasang Diokno sud sa compound sa Commission on Human Rights sa Dilliman, Quezon City pila ka oras sa wa pang iyang proklamasyon.
Di ba ang tinuod nga kahiusahan mao ang paghangop sa tanan, bisan sa mga naghupot og sukwahi nga baruganan? Ang gusto ba diay niyang kahiusahan mao ang gi-demanda sa martial law sa iyang amahan nga pagyangu-yango sa tanan?
* * *
Laing di maayong timaan: Ang pagdumili sa iyang tigpamaba nga si Atty. Vic Rodriguez pagtubag sa lehitimong pangutana sa media kon unsay mahitabo sa nasudnong special non-working holiday sa Edsa People Power Revolution kada Pebrero 25? Gilaktawan sab niyang pangutana kon moduaw ba si Marcos sa Estados Unidos diin mahimo siyang dakpon.
Nagtimaan ba ni nga ang sunod nga administrasyon magpili lang sa mga pangutana nga ilang tubagon? Kana kon tugotan pa nilang mangutana ang media.
* * *
Lain pa gyong di maayong timaan: Gitudlo ni Marcos nga press secretary ang abogada nga gisuspenso sa Korte Suprema tungod sa pagpaningil og kuwarta sa iyang kliyente bisan way nahimo nga serbisyo. Gawas sa pasalig nga may kaila siyang mga huwes nga mopabor nila. Gipasanginlan sab siyang tigpakatap og fake news ug sayop nga mga hubad sa balaod.
Nagpasabot ba ni nga imbes mahunong mosamot hinuon ang pagpabaha sa sayop nga kasayuran sa mosunod nga unom ka tuig? Kadakong trahedya kon ang buhis sa katawhan maoy gamiton sa paghilo sa panghunahuna sa henerasyon karon ug sa umaabot nga kaliwatan.
* * *
- Latest
