Hinablon nga pagmahal
Unsay nakaon. Ni Bise Presidente Leni Robredo nga gibarugan mang iyang hangyo, nga wa paminawa sa kasagaran sa iyang mga dumadapig, nga bugtian og radikal nga pagmahal ang mga dumadapig sa iyang mga kaatbang nga nagbugalbugal, nagbinastos, nanginsulto ug nipakatap og sayop nga kasayuran batok niya?
Daghang di katuo. Nga iyang pagsul-ob sa gradwasyon ni Jillian sa New York University ang sinina nga hinablon sa kababayen-an sa Argao. Bisan ni-upload og video nga nagsige og daot niya ang hand painter nga taga Surigao City samtang nagpatik sa desinyo sa sinina.
* * *
Tingali nanghinaot. Si Robredo nga ang pagtuman sa iyang sulti makaiban sa kabangis sa gubat sa social media. Pero nisamot hinuon dayong human sa kampanya ug bisan liwas sa piniliay.
Gani. Ang anak sa hand painter nga si Jocel Capuyan Gozon, nga nangangkon og kredito sa kanindot sa sinina ni Robredo, nabulit sa pagsaway. Ang pipila nga nisabot nga mahimong biktima lang sa fake news sa binayran nga trolls si Gozon nibuyag gihapon nga mas nindot pa gyod unta ang iyang trabaho kon wa pa manglibak sa iyang kustomer.
* * *
Di sayon. Ang pagtaon sa imong nawong kon ang kaatbang nagsige pa og pangulata. Nakasabot tingali si Robredo nganong ang iyang mga dumadapig, bisan unsa kabilib niya, di makasunod sa iyang pagbawos og kaayo sa tanang panamastamas.
Lisod sabton. Nganong wa mohunong ang mga bakak batok ni Robredo bisan napilde na siya sa eleksiyon? Palihokon ba gihapong troll army sa mosunod nga unom ka tuig aron pagpiang daan sa lehitimong mga protesta batok sa sunod nga administrasyon?
* * *
Mas lisod sabton. Kon nasakitang iyang mga dumadapig, nganong pagmahal may tubag sa direktang naigo sa maniobra sa pangilad ug pakauwaw sa niaging unom ka tuig? Kumbinsido ba si Robredo nga di mapun-an ang iyang 14.8 milyones ka botante kon magpadayong tinulisokay?
Pero dunay kaangayan. Nga maoy modaog sa kauwahian. May mas maayo bang plano ang Ginoo para ni Robredo? May milagro bang mahitabo sa disqualification case batok sa iyang kaatbang nga naa sa Korte Suprema? Di bang kalahutay ang alyansa, nga gidalidali pagpanday pagdaog sa eleksiyon, kon magkabangga nang hakog nga mga interes sa mga magtungkawo sa gahom?
* * *
- Latest
