Dawat sa kapildihan

Dili madawat ni outgoing Cordova Mayor Mary Therese Sitoy-Cho ang nahimong resulta sa eleksiyon diin gipildi siya ni konsehal Cesar "Didoy" Suan og kapin sa 4 mil botos.

Si Suan mihipos og 21, 222 votes samtang si Cho duna lay 17,052 votes.

Gitigom ni Cho iyang mga dumadapig aron pagprotesta sa nahimong resulta sa piniliay og mibahad nga mosang-at og reklamo atubangan sa Comelec aron awhagon nga mohimo og special election sa lungsod sa Cordova.

Matud niya lapad ang nahitabong tikas sa eleksiyon didto sa iyang lungsod.

Apan ang problema unsaon niya pagpruweba nga nanikas iyang kontra? Bisan og duna siyay ebidensiya, di sab ni mahimong basihan aron mohimo og special election ang Comelec.

Sigun sa balaod mahitabo lang ang special election kun dunay failure of election sa usa ka dapit tungod sa grabing kasamok ug terorismo.

Apan way deklarasyon ang Comelec nga dunay failure of election sa Cordova.

Kun tikas ang hisgutan sigurado ko nga duna puy reklamo si Suan. Gani sa wala ang eleksiyon mitiyabaw na ning daan sa tataw nga maniobra aron paglingla sa mga butante dihang dunay susama niya og pangalan ug apilyedo nga miduso og certificate of candidacy.

Gani gibabagan gyud ni mayor-elect Didoy Suan pagbabag didto sa Comelec ang kandidatura sa usa ka Adidoy Suan.

Bisan unsaon pagtan-aw kabahin to sa maniobra og kahugaw sa duwa sa politika. Kun kinsay nagsugo ni Adidoy Suan nga moduso og CoC siya ray nasayod.

Apan imposible sab nga ang midaog nga mayor maoy mosurambaw sa iyang kandidatura.

Ang akong punto mao nga ang tikad, mosugot ta og sa dili, kabahin ni sa hugaw nga duwa sa politika.

Busa kun mosulod ka niini nasayod kang daan nga kabahin ni sa imong angayang bantayan. Ayaw og tiyabaw nga napildi ka tungod sa tikas ug modemanda og special election.

Dawata ang kapildihan ug pangandam sa sunod nga eleksiyon. Tun-i diin ka nagkuwang ug nasayop sa diskarte sa pamasin mga imong mabawi ang pildi.