Bunga sa pagkabulay-og

Giawhag ni Senador Pangilinan ang Department of Agriculture sa pag-plastar og mga programa nga makapadugang sa produksyon sa mga mangingisda.  Nagtuo usab ang senador nga ang isda nga gi-import gikan sa China gikan ra usab sa atong kadagatan.  Sama’g nanagat ra ang senador ni’ng iyang pamahayag. Apan dayag ang kabaligho sa maong kahimtang. Sa kalapad sa atong kadagatan, inay kita’y mamaligya’g isda, kita na man hinoon ang gibaligyaan.  Daw nangalisbo man ang importasyon sa DA. Apan pasagdi na lang kay aduna ma’y panultihon nga, “Ayaw na lang butangi’g malisya ang buhat nga mahimo ra’ng ikapasangil sa pagkabulay-og sa hingtungdan.  Fezteleern!

Estoryaheee PDP

Ang PDP-Laban-Cusi faction nakahukom pagsagop kang Mayor Sara Duterte isip ilang kandidato pagka-bise presidente karong 2022 Elections. Gipili sa PDP-Laban si Mayor Sara kay alang kanila anaa sa Mayor ang mga credentials, adbokasiya ug panglantaw alang sa nasud.  Dula-pulong ra ang pamahayag sa PDP-Laban rason sa ilang pagsagop ni Mayor Sara Duterte.  Sa ilang kahimtang karon nga daw ilo’ng tuwapos, tungod kay wala sila’y kaugalingong kandidato, ang PDP-Laban ang angay’ng sagopon.  Dili matabunan sa maanindot nga pulong ang baho nga gininhawa nga pareho’ng mogawas sa bâbâ sa tawo.  Estoryaheee!

Langit ra’y nasayod

Mikabat og P4.1 trilyones ang nagahin ug nahatag nga pundo ngadto sa nagkalain-laing ahensya sa kagamhanan sa miaging tuig 2021 diin P909.51 bilyones niini nahatag ngadto sa mga kagamhanan’g lokal nga maoy gitahasan sa pagpang-apod-apod sa hinabang.  Kon gamitan nato og yano nga aritmetik, mokabat sa P9 milyones, kapin kon kulang, sa nagkadaiyang benepisyo ang nadawat sa matag Pilipino. Pagka-adunahan na diay unta sa mga Pinoy. Sayod hinuon kita nga dili ang tanan’g kuwarta gigahin lamang sa ayuda.  Apan sa pangutana kon diin paingon ang kwarta alang sa hinabang, ang tubag sa katawhan, “Langit ra ang nasayod”.  Madahaaan!

Tulingan na pud

Namahayag si Leonardo Flores, ang hamtong nga gikasohan tungod sa pagpangawat og 10 ka kilo nga mangga, nga tuyo lamang niya nga ibaligya ang prutas aron aduna silay ikapalit og pagkaon.   Namaligya diay si Noy Nardo og pagkaon aron aduna siya’y ikapalit og pagkaon.

Makapahinumdom sa akong amigo’ng mananagat nga gibaligya ang iyang kuha nga isda dayon mipalit ug isda’ng tulingan sa merkado.  Sa dihang gipangutana sa rason sa iyang gibuhat, mitubag siya pag-ingon nga, “Alangan ug sige lang isda amo’ng sud-an, tulingan na pud”.  Pagkatoytoy!

Ayaw pag-bra

Giiimbestigahan karon sa kapolisan ang match-fixing nga posibleng hinungdan sa pagkahanaw sa 6 ka mga sabungero didto sa Manila sa mi-aging semana.  Gidudahan nga giparada nila ang bangâ nga matang sa manok ug didto sila mopusta sa kontra.  Ginaingon nga “Sama sa Bra sa babaye nga ikaw-it kon magtalikod, ang mga limbongan mang-limbong usab samtang walay nagsud-ong”.  Ang magduwa sa kalayo, sa kapulihay mapaso gayod sa kalayo. Leksyon sa mga sabungero’ng tikasan: “Dili magsul-ob og Bra”. Maoy gidangat!