Kaligdong sa mga tinudlo
Tulo ka buwan sa di pang piniliay sa Mayo sunod tuig, ang pito ka komisyonado ug tsirman sa Commission on Election (Comelec) pulos tinudlo ni Presidente Rodrigo Duterte. Moretiro sa Pebrero 2022 silang Comelec Chairman Sheriff Abas ug commissioners Rowena Guanzon ug Antonio Kho Jr.
Mahibiling mga tinudlo ni Duterte nga silang Soccoro Inting, Marlon Casquejo, Aimee Ferolino ug Michael Peloton, tanan taga Davao City, si Rey Bulay, di taga Davao pero gradwado sa iyang eskuylahang San Beda, ug bag-ong tulo nga puli nilang Abas, Guanzon ug Kho.
* * *
Sa pagpahigayon sa piniliay’ng presidensiyal sa Mayo 2016 pulos sab tinudlo ni anhing Presidente Noynoy Aquino ang tsirman ug ang mga komisyonado sa Comelec. Pero way makatulisok ni Aquino nga nigamit sa iyang inpluwensiya sa Comelec sa paglawgaw sa piniliay.
Di managsama ang kaligdong nilang Duterte ug Aquino. Sa way pagpaka-aron-ingnon nga iyang pasagdan ang Comelec paghimo sa ilang trabaho, si Duterte way kukaikog nga nipili sa taga Davao, apil nang iyang abogadong si Peloton, pagduma sa piniliay. Aron paghingpit sa kabakikaw sa kahimtang sa Comelec, nidagan pa gyod siya pagka senador.
* * *
Way lipudlipod nga gigamit ni Presidente Duterte ang mga institusyon sa pagpanggukod sa iyang mga kaatbang: Apil nang laktod nga pagpalagpot ni Chief Justice Maria Lourdes Sereno; pagpapriso ni Senador Leila de Lima; pagsuway pagpapriso pagbalik ni kanhi senador Antonio Trillanes; ug pag-imbento og mga kaso batok nilang Bise Presidente Leni Robredo ug ubang giisip nga mga hulga sa iyang administrasyon.
Unsa may makapugong ni Duterte pagpasundayag sa samang kamapangahason pagtilok sa bisan unsang nahibiling kaligdong sa mga institusyon pagsegurong molusot ang tanan niyang gipadagan sa piniliay?
* * *
Angay bang kuyawan silang Bongbong Marcos ug Robredo? Kay, gawas nga gipasanginlan ni Duterte nga dapig sa mga komunista, pulos nag-atubang og disqualification cases sa Comelec. Kon ma-disqualify, makadangop silang Marcos ug Robredo sa Korte Suprema. Nga, mapahinumdoman sila, gidominahan sab sa mga tinudlo ni Duterte.
Mosugot bang mga botante nga itingal nila si Bong Go kansang labing dakong katakos maong pagtilatila sa lapalapa ni Duterte? Mao na lang tingali nay bugtong natong dag-anan: Ang kinatibuk-ang kaligdong sa katawhan; apil na sa iyang mga tinudlo.
* * *
- Latest
