Kumbati

Milutaw gyud ang kabuotan ni Senador Bong Go kay ang pag-withdraw niya sa pagdagan pagka presidente sa eleksyon karong sunod tuig, gitumong aron dili magkasungi si Presidente Duterte ug ang anak nga si Inday Sara Duterte.

Pait ang nahitabo sa sitwasyon ni Bong Go. Giangkon niya nga igo ra siyang mituman sa kagustohan ni Presidente Duterte nga molansar pagka bise presidente, kay si Inday Sara gituohan man nga maoy molansar sa labing taas nga katungdanan.

Apan dihang mi-substitute ra si Inday Sara pagka bise presidente, napugos pag-withdraw si Bong Go kay kon dili niya kini himoon, magkaatbang man sila ug ang anak ni Digong. Mirespito si Bong Go sa mga anak ni Presidente Duterte.

Mao kadto nga gituman na usab ni Bong Go ang mando ni Digong nga pagka presidente ang iyang daganan. Apan nahunahuna ni Bong Go nga posibleng masilo si Inday Sara sa iyang amahan kay anha man kini mosuporta kaniya.

Gusto ni Bong Go nga apil ang mga dumadapig nila ni Presidente Duterte dili maglibog kon asa mosuporta, sa pundok ba ni Inday Sara ug sa ilang grupo.

Hinoon, way problema kay si Bong Go magpabilin man gihapon nga senador hangtud sa 2025.

* * *

Karong adlawa, ang amigo nako nga si Kongresista Rodrigo “Bebot” Abellanosa nagsaulog sa iyang birthday. Lahi ang estelo ni Kongresista Bebot kay kagabii pa gisugdan ang iyang pagsaulog sa adlaw’ng natawhan.

Naghugop na ang iyang mga higala ug dumadapig, ug paghagtok gyud sa alas 12 sa gabii, nagpasabot nga Disyembre 2 na, ug mao na ang iyang birthday, gisugat siya sa birthday songs ug gihangop sa kahigalaan.

Wa na magpapili si Kongresista Bebot ug katungdanan sa kagamhanan sa eleksyon karong sunod tuig, apan ang duha niya ka anak maoy misunod sa iyang mga tunob.

Ang ambongang anak ni Kongresista Bebot nga si BG Rodrigo Abellanosa maoy milansar aron mopuli sa biyaan nga pwesto sa iyang amahan, ug ang igsoon niini nga si Jose Abellanosa milansar sab pagka konsehal sa Cebu City south district.

Suheto sab diay si BG Abellanosa kon unsay trabaho sa kongresista kay Chief of Staff man diay siya sa opisina sa iyang papa didto sa Manila, ug usa siya ka mathematician.

Ang iyang ikasangka sa Cebu City south district mao ang beterano nga konsehal sa dakbayan sa Sugbo nga si Edu Rama. Tan-aw nako, bag-o pa tuod si BG Abellanosa, apan kay anak man siya sa incumbent congressman, lig-on kini nga kandidato. Sama usab sa Cebu City north district nga si Cutie Del Mar nga anak sa kanhi kongresista nga si Raul Del Mar nga way pilde-pilde sa iyang katungdanan, lig-on sab.