Lisud pruwebahan

Seryoso ang pasangil sa developer nga si Ben Aratea batok sa duha ka tag-as nga opisyal sa dakbayan sa Sugbo nga sila si city administrator Floro Casas Jr., city attorney Rey Gealon, MCWD chairman Joey Daluz ug sa anak ni Mayor Edgardo Labella nga si Jaypee.

Matud ni Aratea, nalambigit sa “under-the-table” o kwestiyonable nga mga kalihukan sama sa pagdawat og suborno.

Gihimo ni Aratea ang pasangil atol sa session sa konseho diin siya gipatawag isip resource person maylabot sa usa ka proyekto diha sa Barangay Buhisan.

Buot masayod ang mga sakop sa oposisyon sa konseho nganong gihatag sa dakbayan ang proyekto pag-abli og karsada gikan sa Buhisan paingon sa Toong ngadto sa laing kontraktor diin mogasto ang dakbayan og minilyon bisan andam siyang mohimo niini nga libre tungod kay magamit niya kini sa iyang negosyo isip quarry operator ug nalambigit sa pagmina.

Matud ni Aratea nga gipahunong sa CENRO ang iyang operasyon. Ang mga opisyal sa dakbayan mipasabot nga kini tungod kay way permit si Aratea.

Sa laktud dunay kalagot si Aratea sa mga opisyal nga iyang gihinganlang midawat og suborno tungod sa pagpahunong sa iyang operasyon.

Tungod sa maong kasuko posibleng nagtumotumo siya isip panimawos. Posible sab nga tinuod ang iyang pangangkon.

Tinuod man o dili ang maong pasangil sila ray nasayod niini. Sigurado sab nga dili makapresentar si Aratea og resibo gikan sa mga opisyal nga iyang gipasanginlan pagmatuod nga nidawat sila og suborno.

Lisud probahan ang pasangil ni Aratea. Apan angayang ipasabot sa mga opisyal sa dakbayan nganong kinahanglang mogasto ang dakbayan alang sa road opening kun dunay nitanyag nga mohimo niini nga libre?

Mas sayon probahan kun dunay nahitabong binuang niini kaysa pasangil ni Aratea nga midawat og suborno ang mga opisyal.

Tinuod ba nga paborito sa dakbayan ang kontraktor nga gihatagan nila sa proyekto?

Ug tinuod ba nga paryente ra sab ang maong kontraktor sa kontrobersiyal nga garbage hauler sa dakbayan?