EDITORYAL - Buhi pa ba ang demokrasya

Dakong buhi ang demokrasya sa Pilipinas karon. Kini bisan pa man sa pangangkon sa mga militanteng grupo nga padayon ang pagipit sa kagawasan sa katawhan sa kasamtangang naglingkod nga pamunoan.

Tingali sa ilang sitwasyon ug sa ilang pagsabot tungod kay hangtud karon bisan pila na ka presidente ang nilingkod ug napulihan wala pa gihapon nila makita ang  politikanhong kausaban nga ilang gusto.

Apan kung buot gyud hunahunaon naangkon na sa katawhan ang kagawasan sa halos tanang buot nilang buhaton, gawas lang kun krimen o supak sa balaod.

Ang demokrasya nabalik sa mga Pilipino  dihang napalagpot ang diktadoriyang Marcos kinsa nideklarar og martial rule niadtong Septiyembre 21, 1972. Gani makaingon ta nga dakong buhi ang demokrasya dinhi human aning panagsungi sa pipila ka senador kang Presidente Rodrigo Duterte mahitungod sa mga transaksyon may kalabotan sa pagatubang sa gobiyerno sa pandemiya sa Covid-19.

Miabot na gani sa punto nga personalay na ang tinubagay ni  Duterte ug  Senador Dick Gordon. Timailhan nga dakong buhi ang demokrasya dinhi sa Pilipinas. Kung wala pay demokrasya, dili makapiog ang mga yanong tawo o bisan kinsa batok sa presidente. Magpakahilom nalang  tanang oposisyon tungod sa kahadlok, apan kay demokratiko man nga nasud ang Pilipinas gawasnon ang tanan aron badlungon ug sawayon ang mga  kasaypanan ug  hiwing binuhatan sa mga opisyal sa gobiyerno.

Kung wala pay demokrasya tingali gipadakop na ang tanang mga kritiko ni Duterte ug gipangsirad-an ang mga nagkadaiyang news outlets nga nisaway kaniya sukad pa sa pangampanya hangtud karong siya nay presidente.

Busa angayang ampingan ug paglig-unon kining demokrasyang natagamtaman karon pinaagi sa dili pagabusar niini. Dili kalimtan ang mga mapait nga pagtulon-an sa panahon sa martial law kun diin ang mga naa sa posisyon ra maoy hawod ug dili makareklamo ang mga tawo bisan ilaha pang katungod.

Ang kahulogan sa demokrasya sa tinuoray lang mag-agad kini sa kung unsay pagsabot niini sa mga tawo ug sa ilang gobiyerno. Apan ang labing maayo gyud untang klase sa demokrasya, mao kadtong  ang gahum sa balaod, maoy mopatigbabaw sa tanan,