Ayaw na'g pangutana

Dear Tito Miguel,

Maayong adlaw, ako diay si Janessa, taga Capitol Site,Cebu City. Gusto lang unta ko makahibawo sa rason kun nganong ma-inlove naman ko og babaye nga susama nako. Dili baya ko tomboy, gani tulo na ka lalaki akong nauyab kaniadto. Apan karong tuiga, na-inlove ko og kalit og babaye. Akong gipugngan akong gibati, pero ambot lang uy, naganahan jud ko og babaye. Ngano kaha ni Tito Miguel? —Janessa

Janessa,

Dili na kinahanglan mangutana’g ngano kay sa una nga laki imong mga uyab wa man sad ka mangutana’g ngano sila. Ayaw na pangita’g katin-awan kay ang tiunay nga gugma walay rason. Tingali magsugod sa pisikal nga atraksyon apan inig andar sa koneksyon, wala nay pangutana pa kun ngano lalaki o babaye ang kanimo nikuryente. Ikaw mismo dili kasabot nganong siya.

Kun mangutana ka ngano, buot pasabot para nimo abnormal imong gibati. Normal kini, maski bag-o lang nimo nadiskubre. Walay sayop sa kalit nga pag-usab sa imong gusto. Apan kay nahibulong man ka, suwayan nato’g tugkad ang bag-o nimong pasikad. Posible babaye gyud imong gusto sa una pa, apan ikaw mismo wa kahibawo nga napahipi nimo tungod kay sa imong namat-an, ang babaye para ra gyud sa lalaki. Apan dili tanang naandan subay sa insaktong kamatuoran. Gani, daghan ta’g naandan nga kita ray nabilanggo ug gisilotan.

Hinumdomi ang imong relasyon sa tulo ka lalaki kaniadto. Hingpit ba ka nalipay ug natagbaw? Kay kun mao lagmit sa lalaki ka una nakagusto apan nausab imong pagkatawo. Kun makadumdum ka nga mura’g dunay kuwang nila, posible babaye gyud imong gusto apan nahinayak lang ka nila kay lagi maoy mando sa imong nakita sa pamatasan ug palibot.

Kun di gihapon matubag sa imong kagahapon ang unsay imong gusto karon, ayaw na’g pangutana, ang importante kumportable ug malipayon ka. Ayaw pangita’g katarungan, kay wala kay gibuhat nga kalapasan. —Tito Miguel

Magpatambag ka? Ipada kang Tito Miguel: 0998-581-5856