Pasagdi unsao’g diskarte

Dear Tito Miguel ,

Ako diay si Belle, taga Labangon Cebu City. Naay nanguyab nako, siya si Jose, taga Capitol Site. Ako unta siya sugton, pero nagduha-duha nako kay ako naman hinuon ang gisamok sa ex-girlfriend ni Jose. Na-develop nako niya, pero grabe kaayo iyang ex, ako permi ang padunggon sa FB. Unsa ang angayan nako buhaton Tito Miguel?Dili man gud ko ganahan og samok.  Belle

Belle,

Kay gisamok ka sa iyang ex, lagmit bitter siya o sila pa. Kun wala paka-move-on, dili na nimo problema. Kun sila pa o dili ba kaha wala sila’y closure, dili gihapon na nimo problema. Kun dili sa nanguyab nimo.

Kinahanglan iyang ipakita kanimo ang ebidensiya nga wala na sila. Busa ingna nga duna unta siya’y pag-asa apan agrabyado man ang usa. Paabota unsa iyang sunod nga lakang aron maprobar nga wala na sila. Dinhi nimo masukod kun unsa siya ka pursigido kanimo. Kun mo-ingon lang nga pasagdi siya, naa ra nimo kun matagbaw ka. Kay kun maniguro gyud siya nga di na ka magduha-duha pagsugot niya, iya ipaklaro kanimo nga libre na siya. Apan pasagdi siya unsaon niya’g diskarte.

Kun tiunay siya, iyang i-private message iyang ex, sultihan nga dili ka padunggon sa maski unsa sa social media kay wa na sila’y kalambigitan sa usa’g-usa. Motubag man gyud iyang ex, abtik ug isog man gani sa social media nga daghan makabasa, unsa na lang kaha sa mensahe nga direkta. Diha masusi unsay tinuod nga estado nila. Kun klaro sa chat nga wala na sila, iyang ipabasa nimo, apan siguroha nga ang account iyang ex gyud ang nanag-iya.

Balikon ko, ayaw’g diktar unsaon niya. Ehemplo lang ni sa klaro nga ebidensiya. Lagmit naa pa siya’y laing paagi. Kun di ka ganahag kasamok, i-block o unfollow iyang ex. Ayaw’g patol, ikaw ray maguol. Ang hilabtanon, dili malipayon.   Tito Miguel

Magpatambag ka? Ipada kang Tito Miguel: 0998-581-5856