EOC Cebu City posibleng hatagan og dugang tahas

CEBU, Philippines — Wala ray usbon sa Emergency Operations Center (EOC) Cebu City nga gipangulohan ni reelected City Councilor Joel Garganera.

Apan suma ni Mayor Michael Rama nga iya kining bisitahon pagbalik aron masuta kun unsay pwede ipatuman o dugang buhaton sa EOC Cebu City nga makatabang sa siyudad.

“You know my philosophy and ideology includes the so called Barangay, Bayanihan, Boluntarismo and most of all UKU ta, usa rata, kuyog ta, uban ta, last is MOKADA, Master One, Know All, Do All”, segun ni Mayor Rama.

Kahinumduman ang EOC Cebu City naumol ug maoy nitutok sa pag-atubang sa COVID-19 pandemic ilabi na dihang nahimong epicenter sa COVID ang Cebu City.

Duna sila’y mga personnel nga maoy mo-trace sa mga nagpositibo sa COVID, mo-extract ug modala sa mga COVID-19 positive patients sa mga isolation facilities sa Cebu City kaniadto.

Gani mitabang sab sila sa pagpahinumdom sa katawhan nga padayon nga mosunod sa basic health protocols aron malikayan nga matakdan sa maong virus.

Apan dihang mikunhod na ang kaso sa COVID-19 sa siyudad sa Sugbo ug nahimo ng alert level 1 ang Cebu City ang mga personnel sa EOC gihatagan og laing tahas.

Mitabang sila sa Cebu City Health Department dili lang sa vaccination campaign kontra COVID apan apil na sab ang pagbatok sa kaso sa dengue sa siyudad.

Gani sa EOC mismo duna may vaccination nga nahitabo diin tutukan nila ang mga bata isip pagpangandam sab sa pagpahigayon na gyud unya sa face-to-face classes. —MEL (BANATNEWS)