Garcia ug Davide nanghinaot nga magpadayon ang panaghiusa

CEBU, Philippines — Nanghinaot si Gobernador Gwendolyn Garcia nga mapadayon ang panaghiusa tali kaniya ug sa iyang kauban sa hunta probinsiyal sa sunod nga tulo ka tuig nga termino.

Atol sa inaugural session sa 16th Sangguniang Panlalawigan kagahapon si Garcia nagpasalamat sa mga miyembro sa provincial board kinsa nipaluyo sa kaniya sa niaging tulo ka tuig hilabina sa mga hagit nga giatubang sa iyang administrasyon.

Apil niini ang pandemiya sa COVID-19 nga sulod sa duha ka tuig gisukod ang probinsiya bisan sa mga polisiya nga gipatuman niini nga gisupak sa nasudnong kagamhanan.

Gihinumduman ni Garcia nga pipila sa mga polisiya niya sama sa quarantine sa OFWs, pagpasulod sa mga unvaccinated travelers ug face mask policy nga gihagit tungod kay wala makauyon ang nasudnong kagamhanan ug gihulga pa siya nga ikiha.

Apan matud ni Garcia nga ang provincial board gipangulohan ni Bise Gobernador Hilario Davide III nisuporta kaniya pinaagi sa pagpalabang og ordinansa nga nipaluyo sa iyang mga gipangluwat nga executive order.

“We aim spirit substance and reality to that word that sometimes is most elusive to other local government units. And that is unity. Kahiusahan. Nagkahiusa atong direksiyon, nagkahiusa ang atong tumong. Nagkahiusa ang atong pagpangga sa mga Sugboanon. Over and above whatever political affiliations we may have, we rose above our own personal feelings , interest and biases”, matud ni Garcia.

Samtang si Davide nipadayag sa iyang panghinaot kagahapon nga mapadayon ang maayong relasyon ug kahiusa sa mga miyembro sa provincial board.

“More challenges are moving in the horizon, the rising costs of fuel that has pushed the prices of essential goods through the roofs is burdening for the Cebuanos. Legislative measure that will help open more opportunities to hamper the high cost of living protect the poor from opportunists and sustained gains of the program the Capitol will be the new challenge of this August chamber”, matud ni Davide.

Awhag ni Davide sa provincial board nga mopasar og measure aron dili kaayo dako ang impact sa mga Sugboanon sa padayon nga pagsaka sa presyo sa gasolina. BDB (BANATNEWS)