One Cebu wa pay gi-endorsar pagka-presidente

CEBU, Philippines — Giklaro sa One Cebu, partido ni Gobernadora Gwendolyn Garcia nga wala pa silay giendorsar o gisuportahang kandidato sa pagka presidente alang sa 2022 elections.  Sukwahi kini sa migawas nga usa ka balita (di sa Banat News).

Sumala ni Garcia nga “premature” pa nga mohimo sila og desisyon kon kinsa ang ilang suportahan sa umaabot nga piniliay.

“..but right now it is too early. As you can see, in the national scene things are still so fluid, that is why One Cebu has never jumped into the fray while others did, declaring too early their allegiances only to find out that such allegiances become irrelevant,” matud ni Garcia.  Sumala sa gobernadora nga dili siya ganahan nga masusama sa ilang “sayop” sa miaging piniliay nga nidesisyon sila og sayo kun kinsa ang suportahan pagka presidente nga walay igong konsultasyon sa ubang  miyembro sa pamilya.

“I think you can go back to your archives and remember what acrimonious and divisive thing it was in the family because some members were not inclined to support the declared chosen candidate for president,” matud ni Garcia.

Giangkon sa gobernadora nga karon adunay lain-laing “inclination” ang pipila sa mga membro sa ilang pamilya sa mga nilansar pagka presidente.

Una niini, si Kongresista PJ Garcia sa Tersero Distrito miingon nga gikonsiderar sa One Cebu si Manila Mayor Isko Moreno sa presidential bid niini, samtang sila ni Kinto Distrito Kongresista Duke Frasco ug asawa niining si Mayor Cristina Garcia-Frasco ang matod sa gobernador kaniadto pa nga  “naturally sympathetic” ni Presidentiable Bongbong Marcos Jr.

Si PJ sa iyang Facebook post kagahapon, nitataw nga sa pagkakaron wala pay giendorso ang ilang partido.

“As far as One Cebu and allied Mayors are concerned, No endorsement has been given to any candidate. A clarification is in order,” pagtin-aw pa niya

human nga matod pa namahayag si Liloan Mayor Christina Frasco nga mosuporta ang mga 44 ka mga mayor sa probinsya sa Sugbo kang Marcos.  Si Christina nipagawas sab og pamahayag pagklaro nga ang iyang gisulti subay lang sa iyang kapasidad isip Presidente sa League of Municipalities in the Philippines (LMP-Cebu Chapter).  “I fully respect the process of One Cebu Party, which has yet to give its endorsement to a Presidential candidate. With deference to the leadership of One Cebu, my hope is that the BBM-Sara Uniteam would be given serious considerations,”matud pa niya.

Atol Governor’s Night niadtong Nobiyembre 26, sa Capitol Social Hall, si Marcos nikomedya sa iyang mensahe nga ilang gipaabot sa iyang runningmate nga si Davao city Mayor Sara Duterte ang “tam-is nga oo” sa gobernadora nga mosuporta sa ilang kandidatora.

Si Garcia niangkon mao kadto ang unang higayon nga gipanguyaban ang iyang suporta atubangan sa dili momenus 200 ka mga tawo nga iyang gihulagway nga “quite unique.”(BANAT NEWS)