Pista sa Lapu-Lapu wa nay prosesyon
CEBU, Philippines — Ang ipahigayon nga motorkada sa Dakbayan sa Lapu-Lapu maoy silbing hulip sa procession ug fluvial procession sa umaabot nga tinuig nga pangilin sa Birhen sa Regla sa November 20 ug 21, 2021.
Si Father Renante Ga, parish priest sa Nuestra Sra Virgen de Regla ug mga sakop sa komite sa piyesta ang subli nga magtagbo sa Oktobre 29, 2021 alang sa pag-finalize sa pagahimoon nga mga kalihokan.
Sa pasiunang panagtagbo sa mga sakop sa komite nasayran nga sugdan sa November 11, 2021 ang siyam ka adlaw nga novena mass samtang himoon usab ang pontifical mass sa November 20, 2021.
Dugang niini sa adlaw sa dili pa magsugod ang Novena o sa November 10, 2021 maoy naandan ang pagdala sa Imahen sa Birhen sa Regla sa City Hall alang sa pagahimoon nga overnight vigil sa mga kawani nga pangulohan ni Mayor Jonard Ahong Chan.
Nunot usab sa pasiugdahan nga mga kalihokan sa dakbayan gikasabotan ang pagpahigayon og tulo ka hugna nga motorkada.
Ang unang motorkada sa November 6, 2021 isip hulip sa naandan nga walk with Mary sa pagbukas sa unang adlaw sa misa nobinaryo sa alas 8 ang takna sa buntag.
Himoon usab ang grand motorcade sa November 19 human sa misa sa alas 2:30 sa hapon
Si Arsobispo Most Rev. Jose Palma maoy modumala sa Pontifical Mass sa November 20, 2021, sa adlaw sa kapistahan.
Higpit gihapon nga ipatuman ang health protocol nga naglakip sa limitado nga kapasidad ang pasudlon sa simbahan.— MEL (BANATNEWS)
- Latest