Mga residente gitudloan paghimo og ecobricks

CEBU, Philippines — Gipatudloan sa usa ka pribadong nagduma’g pantalan sa San Fernando ang silingang mga lumolupyo sa baybayon nga mohimo og mga ecobricks nga ilang bayloan og pagkaon.

Kani nga inisyatiba makatabang og dako sa mga pamilya karong panahon sa pandemiya sa coronavirus (CoViD-19).

Ang Solid Earth Development Corp. (SEDC) nilusad sa ilang “Food for Trash: The Ecobricks Project”  diin ang mga plastic nga basurang ilang mahipos himuong ecobricks.

Onse ka mga panimalay sa Sitio Baro sa Barangay South Poblacion sa maong lungsod ang gibansay niadtong Pebrero 18,2021 aron manghimo og plastic bricks.

Ang SEDC nakapagawas og P90 mil sa maong programa gikan sa pagsugod hangtud sa Hunyo 30 pinaagi sa pagpalit og bugas aron ibaylo sa nahimong ecobricks sa mga tawo.

Si Mitzie Almira I. Carin kinsa maoy namuno sa maong proyekto miingon nga ang matag kilo sa nahimong ecobricks ilisan sa SEDC og usa ka kilo nga bugas, duha ka paketeng noodles ug usa ka de lata.

Ang ecobricks ginama gikan sa mga botelyang plastic nga suksokan og klase-klase sab nga mga basurang plastic ug sansanon kini sa sulod.

Gikan sa pagsugod sa programa ang SEDC nakatigom na og 891 ka kilong ecobricks. Ang maong mga eco bricks gigamit nila karon isip kahon sa nursery sa kompanya sa bukirang bahin sa Magisco sa samang lungsod.

Gamiton pa sab ang uban sa paghimog mga lamesa ug bangkô nga ipasundayag unya sa SEDC-St. Augustine Eco-pilgrimage Park didto sab sa Magisco.

Ang programa gitambayayongan sa Pagtambayayong Foundation, Inc., nga gipangulohan ni Liza Tumulak uban nilang Norma Siangko ug Grace Nebria sa Looc Naval Homeowners Association, Inc. sa Lapu-Lapu City.

Nagtinguha ang grupo nga sundon sab kini sa ubang mga lugar aron makatabang sa komunidad og sa kalikopan gikan sa polusyong dala sa plastic nga basura.

“Tuyo ug tumong nato nga maka-abag sa lokal nga kagamhanan sa pagduma, pagmugna’g  ecobricks gamit ang basurang plastic nga magamit sa paghimo’g mga hulma, muwebles, kinahong tanaman, koral, paril ug bungbong ug uban pa,” matud ni Carin.

Pinasubay sab kini sa Republic Act 9003,  o Solid Waste Management Act o RA 9003 nga nagmando sa tana sa hustong paghipos sa basura, pag-recycle niini.

“Paagi kini nato sa pakig-alayon sa pagkunhod sa polusyon ug pagpalingkawas sa Pilipinas isip ‘third worst polluter of the ocean,” ilabi na nga ang kapupud-an anaa uluhan sa coral triangle sa habagatang sidlakang Asya asa nahimutang ang pinakataas nga coral diversity sa tibuok kalibutan,” dugang pa ni Carin.—IBM (BANATNEWS)