Kapolisan nihatag og final ultimatum sa leisure bikers
CEBU, Philippines — Ang kapolisan sa Dakbayan sa Sugbo nihatag og final nga ultimatum sa leisure bikers nga mosunod sa tanang health protocols.
Ug kong dili sila mosunod ang Cebu City Police Office morekomendar ngadto sa Emergency Operations Center nga i-ban ang maong kalihokan.
Matud ni Police Lieutenant Colonel Wilbert Parilla, Deputy Director for Operations sa Cebu City Police Office nga nihatag sila og final warning human 16 ka leisure bikers ang nakalapas sa health protocols.
Ang mga nadakpan mao kadtong mga wala nagsul-ob og tarong sa ilang facemask, wala mag-face mask ug wala mosunod sa social distancing.
Ang kapolisan nipahigayon og hiniusa nga operasyon sa checkpoint uban ang Cebu City Transportation Office, City Traffic Enforcement Unit ug Prevention Restoration Order, Beautification and Enhancement diha sa Transcentral Highway sa Barangay Busay niadtong Sabado adlaw”nga Sabado gikan sa alas 5:00 sa buntag hangtud sa alas 8:00 sa buntag.
Ang mga nadakpan nga bikers nga adunay identification cards isyuhan ug citation ticket ug ang walay ID gidala diha sa Ramos Gymnasium aron mobayad sa multa o mohimo og community service.
Sa laing bahin, sukad gipatuman ang “Bakuna Bubble” sa unang bahin karong buwana niabot na sa 309 ka mga establisamento ang giinspeksiyon sa kagamhanan sa Siyudad sa Sugbo ug pulos gyud kini niimplementar sa maong polisiya.
Matud sa hepe sa EOC nga si Konsehal Joel Garganera nga gihangop sa mga negosyante ug customer ang polisiya nga ang bakunado lang ang makasulod sa ilang mga establisamento.
Matud ni Garganera nga aduna sila’y gibuhat nga random nga pag-inspeksyon sa mga establisamento.
Sayo pa, gibutyag ni Acting Mayor Michael Rama nga gihimo na nga modelo didto sa kaulohan ang Bakuna Bubble nga gisugdan dinhi sa Siyudad sa Sugbo. Matud ni Rama nga dili kini diskriminasyon sa dili mga bakunado.
Ubos sa Executive Order No. 142 ni Rama maka-dine in ang mga bakunado ubos sa 30 porsyento nga kapasidad sa kan-anan.
Samtang ang personal care services sama sa beauty salons, barbershops, beauty parlors, massage parlors, ug mga nail spa limitado usab sa 30 % nga kapasidad alang sa vaccinated customers. BDB (BANATNEWS)
- Latest