Mabdos ug kapuyo nga akyat-bahay naaktohan

CEBU, Philippines — Mabdos nga gipasanginlang ‘akyat bahay’ ang nadakpan sa kapulisan sa Dakbayan sa Talisay kagahapon sa buntag diha sa Ramona Village, Barangay Dumlog.

Ang iya sab nga kapuyo nga maoy silbing lookout ang wa kaipsot sa mga otoridad. Ang mabdos nga suspek mao si Franceng Dinglas, 18, samtang ang kapuyo niini mao si Crisanto Saraga, 36, parehong molupyo sa maong dapit. Samtang ang gibiktima sa duha mao si Jemar Libot, 36 , kinsa dali nga nagpatabang sa kapulisan human iyang nakuhaan og video ang duha nga nihimo sa krimen.

Wa hinuon gilimod ni Dinglas ang krimen ug nitug-an nga kaupat na kahigayon niya kini nga gibuhat ang modus.  Si Dinglas upat ka buwan nga nagsabak apan nipasabot nga wala siya kahibawo nga nabuhat na diay niya ang pagpangawat.

Ang kapuyo niini nga si Saraga nanghimakak sa pasangil nga siya lakip sa krimen.

Si Police Lt. Col. Gerard Ace Pelare nitataw nga si Saraga nagsulod- gawas na kini sa bilangguan gumikan sa kalambigitan sa kawat ug sa ilegal nga drugas.

Nakakuha sab og P1,300 nga salapi ang mga otoridad gikan sa mga dinakpan nga gituohan nga ila kining kinawat.

Ang duha ka mga dinakpan gibalhug sa bilangguan nga gikatakdang pasakaan og kaso.

Sa pikas bahin, mga representante sa upat ka mga tindahan sa maong dakbayan ang nipatim-aw sa kapolisan ug mitumbok sa nadakpang giingong budol-budol nga nabiktima sab sila niini.

Gibutyag ni Police Corporal Eleazar Belciña, imbestigador sa Talisay City Police Station miingon nga ang usa sa nabiktima nga tindahan dunay video footage sa pagkahitabo sa krimen.

Nagpakaharon-ingnon ang suspek nga mopalit og ream nga sigarilyo. Iya dayon nga gibutang sa iyang motor dayon paandar samtang iya pang gisugo ang tindera sa pagkuha sa lain niyang paliton, pagtalikod sa tindera nisutoy kini.

Ang gitumbok sa mga reklamante mao si Alcher Pangaan nga nadakpan sa lungsod sa Minglanilla sa miaging adlaw. Napasakaan na kini ug kaso ug giandam na sab ang dugang pang mga kaso sa mga reklamante gikan sab sa Talisay.— IBM (BANATNEWS)