CEBU, Philippines — Nagtinguha ang kagamhanan sa Dakbayan sa Mandaue nga makasulod ug maka-inspection sa usa ka pribadong lote tapad sa Opao Elementary School sa Barangay Opao human namatay ang duha ka 5-anyos nga bata tungod sa dengue ug natala ang 15 ka kaso sa maong sakit sa mga estudyante sa eskwelahan.
Matud ni Mayor Thadeo Jovito “Jonkie” Ouano, adunay mga residente nga nipadayag sa ilang kabalaka nga posibleng breeding site sa mga lamok ang maong lugar hinungdan nga gipangita sa siyudad ang tag-iya niini aron mangayo og permiso nga masusi kini.
Matud sa mayor nga ilang gisusi una kon gipanag-iya ba sa Virginia Farms o Virginia Foods ang maong lote.
Apan human mangayo og tabang kang kanhi Mandaue Chamber of Commerce and Industry president Mark Anthony Ynoc nasayran nga dili diay sakop sa maong mga kompaniya ang maong propiyedad.
Gibutyag ni Ouano nga wala pa sila makasulod sa lote tungod kay gibantayan kini sa usa ka security guard.
Matud usab sa mayor nga wala nila basola ang bisan unsang kompaniya o tag-iya sa propiyedad apan nipadayag og kabalaka ang mga residente hinungdan nga kinahanglan kini nga masusi.
Gibutyag usab ni Ouano nga iyang gibisita niadtong Huwebes ang mga pamilya sa duha ka 5-anyos nga bata nga namatay tungod sa dengue sa mga barangay sa Umapad ug Opao.
Gikompirma niya nga adunay 15 ka kaso sa dengue nga natala sa Opao Elementary School.
Human sa iyang pagbisita, nakigtagbo si Ouano kang City Health Officer Dr. Debra Catulong ug ubang personnel sa Opao Barangay Hall aron hisgotan ang dugang nga mga lakang batok sa dengue.
Ipadayon sa siyudad ang pagpatuman sa 4S strategy sa Department of Health (DOH) ilabi na ang information campaign ug mga kalihokan sa paglimpiyo sa palibot.
Nakigkoordinar na usab ang city government sa Administrative Office sa Department of Education (DepEd) Mandaue City Division pinaagi kang Dr. Edgar Espina human nihangyo ang division nga ipahigayon pag-usab ang misting operations sa tanang eskwelahan.
Si Ouano nangutana kang Catulong kon igo ba ang suplay sa kemikal sa City Health Office alang sa maong operasyon diin kon kulangon kini mopalit ang siyudad og dugang nga kemikal. (BANAT NEWS)