CEBU, Philippines — Mas nigrabe ang kalidad sa hangin sa Metro Cebu ug Toledo City niadtong Domingo, Septiyembre 20, diin pareho nang miabot sa lebel nga “acutely unhealthy” ang Air Quality Index (AQI), samtang nagpadayon ang epekto sa transboundary haze gikan sa mga sunog sa Indonesia.
Sa alas-11 sa buntag niadtong Septiyembre 20, nakatala sa Environmental Management Bureau Region VII (EMB-7) ang AQI nga 260 sa Metro Cebu monitoring station, nga giklasipikar nga “acutely unhealthy.”
Sa monitoring station sa Barangay Cabitoonan, Toledo City, nagtala usab og AQI nga 215, nga giklasipikar usab nga “acutely unhealthy.”
Nagpakita kini sa dakong peligro kalidad sa hangin kumparar sa miaging mga adlaw.
Tungod sa nagkagrabeng kalidad sa hangin, gisuspenso sa pipila ka mga lokal nga pangagamhanan ang face-to-face classes sa tanang lebel sa mga pampubliko ug pribadong eskwelahan karong adlawa Septiyembre 21, 2026.
Ang suspensiyon gihimo isip precautionary measure tungod sa pagkadaot sa kalidad sa hangin sa Metro Cebu.
Ang mga nagpagawas og advisories kagahapon sa hapon mao ang Cebu City, Talisay City, Mandaue City, Lapu-Lapu City, Naga City, Minglanilla ug Carcar City.
Gihangyo ni Minglanilla Mayor Lheslen Enad ang mga residente, ilabina ang mga bata, nga likayan ang dili kinahanglan nga paggawas ug magpabilin sa sulod sa balay kutob sa mahimo.
Samtang, gisuspenso usab ni Talisay City Mayor Gerald Anthony “Samsam” Gullas ang face-to-face classes sa tanang pampublikong eskwelahan sa siyudad karong Lunes, Septiyembre 21, tungod sa “acutely unhealthy” nga kalidad sa hangin.
Ang face-to-face classes sa mga pribadong eskwelahan ug sa Talisay City College (TCC) magdepende sa desisyon sa ilang tagsa-tagsa ka school administration.
Gihangyo ni Gullas ang mga ginikanan nga ipabilin sa sulod sa balay ang mga bata kutob sa mahimo, ug gipasiugda nga ang suspensiyon gitumong sa pagpakunhod sa ilang exposure sa dili maayong kalidad sa hangin.
Sa Dakbayan sa Carcar, gisuspenso sab ang tanang lebel sa publiko ug pribadong mga eskuylahan. Mao sad sa San Fernando ug gipa-shift sa Alternative Delivery Mode (ADM) of Learning ang mga bata, samtang ag CTU-San Fernando Campus pagbuot na sa tagdumala sa maong tunghaan.
Susamang kamandoan sab ang gipagawas sa publicug private schools Liloan, Consolacion ug Cordova.
Padayon nga gimonitor sa EMB-7 ang ambient air quality sa rehiyon tungod sa transboundary haze gikan sa mga sunog sa Indonesia.
Ubos sa advisory sa “acutely unhealthy” nga kalidad sa hangin, gitambagan ang publiko nga limitahan ang mga kalihokan sa gawas sa balay nga makapakapoy sa lawas.
Ang mga adunay sakit sa kasingkasing o respiratory conditions, lakip ang asthma, gitambagan nga magpabilin sa sulod ug mopahulay kutob sa mahimo.
Gitambagan usab ang publiko nga likayan ang paggawas-gawas kung dili kinahanglan nga biyahe. Depende sa kahimtang, mahimong limitahan ang paggamit sa mga motor vehicle ug mahimong bawasan ang pipila ka kalihokan sa industriya.
Gihangyo sa EMB-7 ang publiko nga kanunay nga mosusi sa opisyal nga mga update ug air quality advisories samtang nagpadayon ang haze ug nag-usab-usab ang kalidad sa hangin.
Gipakita sa monitoring data gikan Septiyembre 1 hangtod Septiyembre 20 ang dakong pag-usab-usab sa kalidad sa hangin sa Cebu: gikan sa “very unhealthy” niadtong Septiyembre 1, ngadto sa “acutely unhealthy” niadtong Septiyembre 3, miarang-arang ngadto sa “fair.” — /IBM (BANAT NEWS)