Unity Walk ug covenant signing gihimo sa Mandaue

CEBU, Philippines — Gipasiugdahan sa Commission on Election (Comelec) ang Unity Walk ug Peace Covenant Signing sa mga lokal nga kandidato sa Mayo 12 nga eleksyon sa Siyudad sa Mandaue.

Nagtagbo ang mga kandidato sa Team Mandaue pinangulohan ni mayoralty candidate Jonas Cortes ug One Mandaue nga gipangulohan usab ni mayoralty candidate Jonkie Ouano. Gitumong ang kalihukan sa pagpanumpa sa mga kandidato alang sa limpyo, hapsay, patas, ug maki-angayon nga eleksyon.Human sa usa ka misa diha sa National Shrine of St. Joseph sa Barangay Centro gisunod ang paghiusa sa tanang kandidato sa paglakaw paingon sa Mandaue City Cultural ang Sports Complex.                                                                                                                                  

Sa laing bahin ang Commission on Elections sa Rehiyon 7 nagtinguha sa pagpalig-on sa ilang koordinasyon sa Department of Education (DepEd-7) aron masiguro ang paspas nga pagtubag sa bisan unsang isyu nga maglambigit sa mga magtutudlo nga moserbisyo sa umaabot nga piniliay.

Si Regional Director Atty Francisco Pobe niingon nga hingpit ang ilang pagpangandam, ilabina sa pagbansay sa mga magtutudlo nga moserbisyo sa eleksiyon.

Gipasalig ni Pobe nga ang mga magtutudlo nipaubos na sa pagbansay-bansay, apan nagpabiling tentative ang ilang status sanglit gisusi pa sa komisyon kon nakatambong ba sa aktuwal nga mga sesyon ang tanang nalista sa DepEd.

Dugang pa, gibansay usab ang mga buffer teachers aron matubag ang bisan unsang mga last-minute concerns.

Ang seguridad maoy nag-unang gitutokan sa ilang opisina, ilabina mahitungod sa luwas nga transportasyon ug escort sa mga magtutudlo.

Gihatagan usab og gibug-aton ni Pobe ang paghatag og saktong mga probisyon, ilabina sa pagkaon ug tubig, tungod kay dili malikayan nga dunay mga magtutudlo nga dili makaangay sa pagkaon ug tubig sa polling areas kung asa sila ma assign.

Si Pobe nitug-an usab nga adunay mga features, ilabina sa mga bag-ong makina sa eleksyon, ang kinahanglang kat-unon sa mga poll workers una pa sila mopaubos sa eksaminasyon.

Kinahanglang mopasar ang mga magtutudlo sa eksaminasyon nga naglangkob sa theoretical ug practical nga aspeto nga gipahigayon sa Department of Science and Technology (DOST) sa dili pa sila ma-certify sa pagserbisyo. Gie-Ann N. Tapic/MEL BANAT NEWS