CEBU, Philippines — Midangop sa National Bureau of Investigation Central Visayas ang mga tawo kinsa mireklamo batok sa usa ka wedding ug event planning services tungod sa ilang kabalaka nga na scam na sila sanglit dili naman kini makontak bisan nakahatag na sila sa ilang kwarta.
Ang mga mihugop sa NBI-7 nga mga reklamante kasagaran kanila mga kaslonon kinsa nabalaka nga mapurnada ang kwarta nga ilang downpayment sa gikuha nilang wedding planner.
Adunay mag-partner nga karon Hunyo 22 na unta ang schedule sa ilang simple ug hassle- free wedding kay pareho silang adunay trabaho, apan nahugno sila sa dihang ang coordinator dili naman andam motuman sa ilang gikasabotan bisan og nakabayad na sila.
Susama usab niini ang estorya sa ubang reklamante, gani excited na unta sila kaslonon nga moabot ang ilang big day sa umaabot nga buwan kay nahatag naman nila ang kapin sa P105 mil sa mao gihapong coordinator.
Naenganyo sila sa P125 mil nga wedding package alang sa 100 ka bisita apil na ang pagkaon ug ang venue sa iladong hotel, weddning gowns, entourage gowns ug ubang serbisyo basta igo nalang mopaso ang kaslonon.
Apan na shock sila sa dihang nasayran nga daghan ang nireklamo kay dili naman magparamdam ang coordinator.
Ang NBI-7 nipahimangno nga dili maayong mosalig dayun sa mga nindot kaayo nga mga promotion nga maisip na gani nga red flag o angay magmatngon.
Sagad sa mga reklmante misalig sa coordinator kay matud nila malamposon man kuno ang mga events niini base sa referrals sa ilang mga kaila.
Gusto sa mga reklamante nga mauli ang ilang kwarta nga hinaguan aron magamit nila sa gikatakda nilang kasal.
Si Atty. Dominador Cimafranca, Assistant Regional Director sa NBI-7 nipadayag nga andam silang motabang sa mga reklamante sa higayon nga dili gyud motuman sa gikasabotan ang event coordinator.
Giklaro sa NBI nga kasagaran sa mga midangop sa ilang buhatan, pulos pa man wala mahitabo ang kasal busa aduna pay kahigayonan nga matuman ang anaa sa ilang kontrata.Ang gitumbok nga wedding planning coordinator wala pa mohatag sa iyang pamahayag. — IBM BANAT NEWS