CEBU, Philippines — Nagbakho nga nagpakitabang sa kapolisan sa Dakbayan sa Talisay ang usa ka ESL teacher human giingon nga gihinol ang iyang pribadong parte sa lawas sa usa ka construction worker diha sa Barangay Bulacao, Dakbayan sa Talisay kagahapon sa buntag. Ang biktima nagpangidaron og 23-anyos samtang ang suspek nagpangidaron og 28-anyos nga lumad nga taga lungsod sa Pinamungajan.
Si Police Lt. Col. Epream Paguyod, hepe sa kapolisan sa Talisay nitataw nga naghuwat og kasakyan ang biktima. Apan natingala siya kay gihikap sa suspek ang iyang kinatawo.
Matud pa ni Paguyod swerte nga adunay nagpatrolyang mga polis sa lugar nga nadangpan dayon sa dalaga hinungdan nga dali kaayong nadakpan ang suspek.
Apan ang suspek kusganong mihimakak sa pasangil bisan dunay mga testigos nga nitudlo kaniya nga nihimo sa law-ay nga binuhatan.
Si Paguyod niingon nga padayon ang ilang pagsusi sa background sa suspetsado. IBM BANAT NEWS