Gidaghanon sa mga pasahero sa pantalan gilaomang mo doble

CEBU, Philippines — Nag-abot-abot na sa pantalan sa Sugbo ang mga pasahero nga mouli sa ilang tagsa-tagsa ka probinsiya aron adto magsaulog sa Semana Santa.

Nasayran nga heightened alert karon ang Cebu Port Authority sukad niadtong Marso 17 hangtud sa 31, 2024 sa samang buwan aron masiguro nga hapsay ug luwas nga pagbiyahe sa mga pasahero.

Sa entrance sa Pier 1 dunay mga polis ug coast guard personnel nga nagbantay.

Adunay gimontar usab nga malasakit help desk, police assistance desk ug first aid station nga maoy motubag sa mga pasahero sa ilang panginahanglan.

Nasayran nga 500 ka personnel sa Philippine Coast District Central Visayas ang gipakatap sa mga pantalan sa tibuok Central Visayas.

Adunay sniffing dogs nga gipasuroy nga maoy mosusi sa mga bagahe sa mga pasahero.

Gilaoman nila karong adlawa nga mo doble ang gidaghanon sa mga pasahero nga modagsa sa mga pantalan.

Gipahimangno sa PCG nga dili magdala og mga hait nga butang, flamble subsatance ug uban pa sa pagbiyahe.

Samtang sa Dakbayan sa Talisay walay bisan unsa nga hait nga butang ang gitugotan nga makasulod sa mga simbahan siyudad subay sa pagsaulog sa Semana Santa.

Si Police Lieutenant Col Wayne Magbanua, hepe sa kapolisan sa siyudad nagkanayon nga panahon karon sa pagpamalandong ug dili angayan ang mga badlongon maghimo og kasamok diha sa mga simbahan.

Ang kapolisan sa siyudad ubos karon sa heightened alert diin gilaoman ang pagdagsa sa mga tawo diha sa mga simbahan.

Nunot niini, ang kapolisan sa siyudad wala magdili sa pag-inom og ilimnong makahubog atol sa adlaw sa pagkabanhaw.

Apan giklaro ni Magbanua nga ang mo inom og ilimnong makahubog siguro nga dili magmaoy o mangita og gubot. Lakip sa ilang i-monitor ang mga tawo nga anha sa coastal area.

Naandan na nga sa adlaw sa pagkabanhaw diha magtapok ang katawhan sa kadagatan.

Matud ni Magbanua nga sa adlaw nga Sabado ang iyang mga sakop mag-monitor na diha sa kabaybayonan.  Gabriel C. Bonjoc (BANAT NEWS)

Show comments