CEBU, Philippines — Alarming na ang paghulagway sa pangulo sa Talisay City Disaster Risk Reduction and Management Office (CDRRMO) labot sa kainit sa panahon nga nasinati karon.
Si Alvin Santillana nibutyag nga angay lang nga mohimo na og lakang ang katawhan aron malikayan ang kadaot sa grabe nga kainit.
Usa na dinhi nga malikayan ang panghitabo nga sunog.
Sud sa duha ka adlaw, 11 ka alarma sa sunog ang girespondehan sa kabumberohan niadtong adlaw nga Domingo ug Lunes.
Samtang sa adlaw nga Martes niulbo ang sunog sa Barangay Cansojong diin 103 ka panimay ang naugdaw.
Sa mga panghitabo nga sunog motumaw kini ini’g tungtong sa alas-10 sa buntag hangtud sa alas-3 sa hapon diin mao ang grabe nga pag-igo sa kainit.
Nipahimangno si Santillana ngadto sa katawhan nga mag inampingon pinaagi sa paglikay sa pagdaob ug pagpataka og labay sa mga upos nga sigarilyo.
Sa pikas bahin, nagtagbo niadtong miaging adlaw sa gipahigayon nilang panagtigom ang mga sakop sa Local Disaster Risk Reduction and Management Council sa Siyudad sa Mandaue.
Sa maong tigom nga ilang gihimo maoy nag-una nilang gihisgutan ang mga lakang sa pagahimoon nilang pagpangandam sa pag-igo sa La Niña human niining nagbagang kainit karon sa panahon.
Ang Bureau of Fire Protection (BFP) miluwat sa ilang mga sugyot ang pagpadayon sa paghingusog sa mga pahimangno sa mga molupyo labot sa paglikay gayod kanunay sa mga butang nga makasunog.
Dugang pa sa kabomberohan nga angayan gayod kining pagahimoon tungod sa nasinati karon nga hilabihan nga kainit sa panahon nga dali kaayong makasunog. — IBM BANAT NEWS