CEBU, Philippines — Cebu City Environment and Natural Resources nireklamo sa buhatan sa Department of Environment and Natural Resources kon DENR batuk sa Cebu Port Authority tungod sa gipatukod niini nga proyekto nga walay Environmental Compliance Certificate kun ECC.
Matud pa sa pangulo sa CCENRO Reymarr Hijara, ang ECC usa ka dokumento nga magtugot sa pagpatuman sa proyekto ug ang gihimo sa CPA, nakamugna kini og dili maayong epekto ilabi na nga talandogon ang kahimtang sa kalikupan.
Gitug-an ni Hijara ang gitrabaho sa CPA makadaut sa kalikupan og adunay daghang mga mananagat ang nanginabuhi usab sa maong dapit.
Kalapasan usab sa Section 4 Presidential Decree 1586 o ang Philippine Environmental Impact System ang gihimo sa CPA. Si Hijara, malaumon nga mopagawas og kamanduan ang Environmental Management Bureau aron mahunong ang maong proyekto sa CPA ug dili mosamot ang kadaut sa kinaiyahan. MEL BANAT NEWS