CEBU, Philippines — Si Cebu City Councilor Philip Zafra, chairman sa peace and order committee sa konseho sa siyudad nipahimangno sa mga tag-iya og resto bars ug mga establisamento nga mokuha una og permit gikan sa kagamhanan sa siyudad sa dili pa sila mophigayon og mga kalingawan.
Ang walay permit dili usab tugotan ang ilang mga kalihokan nga ipahigayon.
Matud pa ni Zafra, gidili karon ang street parties hinungdan nga kinahanglan una sila nga mo apply ug special permits una mopahigayon og parties sa ilang mga resto bars ug establisamento.
Adunay mga kalihokan panahon sa Pista Senyor sa mga balay patigayon ug kinahanglang mo-coordinate kini sa iyang buhatan aron ma-maximize ang tanang resources ug masayod sila sa angayang pangandaman.
Matud ni Zafra nga kadtong magpahigayon og party nga walay permit ilaha kining pahunongon ug dili tugotan bisan ug anaa kini sila sa ilang kaugalingong tugkaran.
Sa pagkakaron wala pa sila’y gihatagan og special permit sa pagpahigayon og party apan aduna nay duha ka establisamento ang niduol sa ilang buhatan nga nahimutang diha sa Salinas, Barangay Lahug ug gipasusi pa kini karon ni Zafra. (BANAT NEWS)