CEBU, Philippines — Ang pangulo sa Cebu City Environment and Natural Resources Office (CCENRO) Reymarr Hijara nibutyag nga gipalawoman pa sa kapolisan ang imbestigasyon sa nahitabo sa ilang buhatan human giingong adunay nawala nga netbook ug mini electric fan.
Matud ni Hijara nga nikabat ngadto sa P10,000 ang kantidad sa netbook ug gipanag-iya kini sa usa ka trabahante.
Nasayran nga wala giapil sa pagdala ang laptop nga diha sa buhatan.
Si Hijara nagkanayon nga kinahanglan ang imbestigasyon sa kapolisan aron mailhan ang responsible nga nikuha sa maong mga butang.
Matud usab ni Hijara nga dili lang sila ang niukopar sa opisina kauban usab nila ang parks and playgrounds nga gibungkag usab ang mga butang sa sulod sa tawo nga nisulod hinuon walay nawala nga butang sa ulahing buhatan. Magpaabot pa si Hijara sa kinatibuk-an nga taho gikan sa imbestigasyon nga gihimo sa kapolisan.
Sayo pa, gituohan nga tawo nga adunay deperensiya sa pangisip ang ni sulod sa buhatan sa CCENRO. BDB (BANATNEWS)