“Tirador” nga nakapatay sa Busay, nadakpan
CEBU, Philippines — Nadakpan piaagi sa hot pursuit operation ang gitumbok nga suspek sa pagpusil patay sa usa ka 19-anyos nga lalake sa Sitio Nivel Hills, Barangay Busay, siyudad sa Sugbo niadtong Sabado sa gabi.
Ang dinakpan giila nga si Wilbert Belarmino, nga dunay mga alyas nga Ibet, Pungkol ug Romnick, 23 anyos nga taga Golden Valley, Barangay Lahug ning siyudad.
Siya maoy suspek sa kamatayon ni Marvin Tangente Caballes base sa pamahayag sa mga testigos ug sa kuha sa CCTV camera nga nakuha sa kapolisan.
Si Belarmino nadakpan ra sab diha sa Sitio Golden Valley, Barangay Lahug Domingo sa gabii.
Sumala pa sa Mabolo Police Station, si Belarmino matud pa usa ka tirador ug nalambigit kini sa illegal nga drugas. Ang biktimang si Caballes giingong tigpayuhot og ilegal nga drugas.
Nakuha gikan sa suspetsado ang usa ka kalibre .45 nga armas ug magazine niini nga dunay duha ka bala.
Gikatakda una kining pasakaan og kasong kalapasan sa Republic Act 10591 ug Comelec Gun ban samtang gihipalig-on pa ang kaso may labot sa pagpatay kang Belarmino. (BANAT NEWS)
- Latest
