Drayber sa traysikol gipusil patay sa pasahero

CEBU, Philippines — Patay diha-diha ang usa drayber sa traysikol human kini pusila sa iyang pasahero diha sa gas station sa Sitio Laray, Barangay San Roque, Dakbayan sa Talisay niadtong Martes sa udto.

Ang biktima mao si Mark Repuela Labalan, 37-anyos taga Sitio Tagunol, Barangay Cogon Pardo, Siyudad sa Sugbo.

Base sa imbestigasyon sa kapolisan nga ang kriminal nisakay sa biktima diin nihapit sila diha sa nahisgutang gas station aron magpatobil.

Apan dihang nagpaabot ang biktima sa iyang turno nga matobilan nikanaog ang kriminal gikan sa traysikol ug nilipot dayon pusil kang Labalan.

Ang biktima nakaangkon kini og samad pinusilan sa iyang wala nga liog nga giingong hinungdan sa kamatayon niini.

Si Police Lieutenant Colonel Randy Caballes, hepe sa kapolisan sa Dakbayan sa Talisay nibutyag nga ang biktima usa ka drug surrenderee kaniadto.

Usa sa ilang gisubay nga motibo mao ang pagkalambigit niini sa ilegal nga drugas.

Nagtuo usab si Caballes nga kaila ang biktima ug ang suspetsado. (BANAT NEWS)