CEBU, Philippines — Naugdaw ang karaang kombento sa Catholic Parish of San Vicente Bato sa Dakbayan sa Toledo niadtong Lunes sa kadlawon. Si FO3 Jercel Rose Versodazo sa Toledo City Fire Station nga nahinabi sa GMA Super Radyo DYSS nagkanayon nga nadawat nila ang alarma sa sunog nga alas 2:42 sa kadlawon. Sa ilang pag-abot nidako na ang kayo ug nakontrolar sulod sa 11 ka minutos.
Ang kayo wala makatapon sa simbahan ug walay gikataho nga naangol og nakalas sa maong insidente.
Matud pa ni Versodazo nga alas 3:05 sa kadlawon nila gideklarar nga fire out. Nasayran nga ang caretaker lang sa simbahan ang nagkatulgan sa karaang kombento tungod kay gihimo naman lang nila kini og bodega human nga naguba atol sa bagyong Odette. Si Versodazo nagkanayon nga nikabat ngadto sa P30mil ang danyos sa maong sunog. Padayon pa ang imbestigasyon sa kabomberohan sa siyudad sa hinungdan sa maong sunog. (BANAT NEWS)