CEBU, Philippines — Usa ka patay’ng lawas sa babaye nga gituohan nga person with disability ang napalgan kagahapon sa buntag diha sa Kinalumsan Bridge, Barangay Mambaling, Dakbayan sa Sugbo.
Ang maong babaye wala pa kini mailhi diin nagsul-ob kini og puwa nga t-shirt ug camouflage pants ug gituohan nga nagpuyo kini ilawom sa tulay.
Base sa imbestigasyon sa kapolisan giingong ang maong babaye gihatod og e-bike diha sa nahisgutang dapit niadtong Domingo ug gani na-rescue pa kini sa mga fire volunteer sa Barangay Mambaling ug Barangay Duljo Fatima sa maong adlaw human kini giingong naglisod paglakaw.
Matud ni Renante Cartajena, volunteer sa Mambaling Fire nga ilaha pa’ng nakita ang maong babae niadtong Domingo nga naglingkod diha sa seawall sa sapa nga nagkupot pa og pagkaon.
Si Cartajena nagkanayon nga nagtuo sila nga aduna kini kauban nga padulong sa ilalom sa sapa gumikan kay dili kini maabot diha sa maong dapit tungod kay maglisod man sa paglakaw.
Matud usab ni Cartajena nga kagahapon sa buntag bisitahon unta nila pagbalik ang maong babaye aron masayran ang kahimtang niini apan tungod sa ilang ka busy nakurat nalang sila nga adunay nitaho nga nakit-an na kining wala nay kinabuhi nga naglutaw diha sa sapa.
Ang kapolisan sa Mambaling Police Statation gipangulohan nila ni Police Staff Sergeant Jonas Ricaplaza ug Patrolman Felmar Gomez uban sa tanod sa Barangay Mambaling nakadawat og taho kalabot sa maong insidente diin dali nila kining girespondehan.
Ang patay’ng lawas sa maong babaye gidala kini sa usa sa mga punerarya sa siyudad.
Base sa imbestigasyon sa kapolisan sa Mambaling Police Station nga ang maong niduol pa kini diha sa manindahay og lechon sa maong dapit aron mangayo og pagkaon diin giingong wala pa kini nakakaon sulod sa duha ka adlaw,
Ang kapolisan padayon pa karon nga nihimo og imbestigasyon ug niawhag sa mga pamilya nga nawagtangan og kabanay sa pagsusi sa maong patay’ng lawas.
Girekomendar usab sa kapolisan nga ipaubos sa autopsy ang patay’ng lawas sa nahisgutang babaye aron masayran ang hinungdan sa kamatayon niini. (BANAT NEWS)